विराटनगर– मोरङ जिल्ला कारागारमा थुनामा रहेका ५० वर्षीय काजीमान सार्कीको शनिबार दिउँसो मृत्यु भएको छ। उनी उर्लाबारी नगरपालिका–६का बासिन्दा हुन् र लागुऔषध सम्बन्धी मुद्दामा थुनामा थिए। जिल्ला अदालत मोरङको आदेशअनुसार २०८१ पुस २९ गते सार्कीलाई पुर्पक्षका लागि कारागारमा चलान गरिएको थियो।

जेलर गौरव ढुंगेलका अनुसार, न्यून रक्तचाप र बान्ता समस्या देखिएपछि उनलाई शनिबार दिउँसो १:२५ बजे कोशी अस्पतालमा भर्ना गरिएको थियो। तर अस्पतालको आकस्मिक कक्षमा उपचारका क्रममा १:४० बजे चिकित्सकले उनको मृत्यु घोषणा गरे।

पोस्टमार्टमका लागि कारागार प्रशासनले पहल गरे पनि आफन्तले अस्वीकार गरेपछि शव परिवारको जिम्मा लगाइएको छ। हाल मोरङ जिल्ला कारागारमा करिब १,२०० कैदीबन्दी छन्।