विराटनगर। विराटनगरको ग्रिनक्रस हस्पिटलबाट एक दिनको नवजात शिशु हराएपछि पक्राउ परेका स्त्री तथा प्रसूतिरोग विशेषज्ञ डाक्टर तपेश्वरलाल कर्णलाई हिरासतमा लिएर नेपाल प्रहरीले अनुसन्धान शुरू गरेको छ ।

प्रहरीले प्रसूति गराउने उपचारमा संलग्न डा कर्णलाई गत शुक्रवार नियन्त्रणमा लिए पनि स्वास्थ्यमा समस्या भएको भन्दै उनी कोशी अस्पतालमा भर्ना भएका थिए । अस्पतालले मंगलवार डिस्चार्ज दिएको छ । उनलाई न्यायिक हिरासतमा राखेर अनुसन्धान शुरू गरिएकोे मोरङ प्रहरीका प्रवक्ता डीएसपी रञ्जनकुमार दाहालले जानकारी दिए । अनुसन्धानपछि पुनः अस्पताल आउने आश्वासन दिएपछि मात्र उनी मोरङ प्रहरी जान राजी भएका थिए । उच्च रक्तचाप र मधुमेहको समस्या रहेको भन्दै डा कर्णले कोशी अस्पतालको जेनरल वार्डको सिंगल क्याबिन २१२ मा भर्ना भएर उपचार गराएका थिए ।

पक्राउ परेका डा कर्ण र भोजपुरको हतुवागढी गाउँपालिका–४ घर भएका २७ वर्षीय गोविन्द राईलाई प्रहरीले ‘व्यक्ति बेपत्ता पारेको कसुरमा’ आइतबारबाट लागू हुने गरी पाँच दिनको म्याद थप गरी अनुसन्धान शुरू गरेको छ ।

कोशी अस्पतालका पूर्वमेसुसमेत रहेका डा कर्णले अविवाहित जोडीबाट जन्मिएका शिशुलाई मोटो रकम लिएर निःसन्तान दम्पतीलाई उपलब्ध गराएको हुनसक्ने प्रहरीको अनुमान रहेको छ ।

पक्राउ परेका राई २६ वर्षीय किशोरीका प्रेमी हुन् । १३ असारमा ती किशोरीको ग्रिनक्रस हस्पिटलमा प्रसूति भएको थियो । उनले ‘नर्मल डेलिभरी’मार्फत छोरीलाई जन्म दिएकी थिइन् । दुई जनाबीचको सम्बन्धबाट गर्भ बसेपछि गोविन्दले प्रेमिकालाई विराटनगर लिएर आएका थिए । शुरूमा ग्रिनक्रस अस्पतालनजिकै रहेको दीपेश मेडिकल क्लिनिकमा लिएर गएका थिए । उक्त क्लिनिक डाक्टर कर्णको हो । क्लिनिकमा आएका बिरामी भर्ना गर्नुपर्दा उनले ग्रिनक्रस अस्पतालमा लगेर उपचार गराउने गरेका छन् । उनको क्लिनिकबाट उक्त अस्पताल ५० मिटर पश्चिममा छ । डा कर्णले ती किशोरीका प्रेमीसँग ३५ हजार रुपैयाँ लिएर प्रसूति गराएको बताइएको छ । उनीहरूबाट जन्मिएको शिशुको व्यवस्थापन गर्ने जिम्मा पनि डा कर्णले नै लिएको प्रहरीले जनाएको छ ।

व्यथा लाग्ने औषधि खुवाएर प्रसूति गराएपछि युवतीलाई अस्पतालले १४ असार दिउँसो डिस्चार्ज दिएको अस्पतालको अभिलेखमा देखिन्छ । डिस्चार्ज हुँदा नवजात शिशुलाई राईले हस्ताक्षर गरेर बुझेका थिए । कर्णले यसअघि पनि शिशुलाई मोटो रकम लिएर निःसन्तान दम्पतीलाई उपलब्ध गराउँदै आएको हस्पिटलका चिकित्सकहरूले आरोप लगाउने गरेका छन् ।

अवैध सम्बन्धबाट गर्भ रहने तथा अविवाहित जोडीसँग डा कर्णको भेट गराउने गिरोह नै सक्रिय रहेको अस्पताल स्रोतको दाबी छ । नर्स स्तरका केही स्वास्थ्यकर्मी पनि डा कर्णका सहयोगी रहेको उनलाई नजिकबाट चिन्ने चिकित्सकहरू बताउँछन् । त्यस्ता जोडीको सम्बन्धबाट बसेको गर्भ पतन गराउने र गर्भपतन गर्न नमिलेर जन्मिने शिशुको व्यवस्थापनका लागि अभिभावकबाटै रकम लिएर डा कर्णले अन्यत्र बिक्री गर्दै आएको आरोप पनि लाग्ने गरेको छ ।