हिपमत डटकम
उदयपुर माघ २३ गते  : यही शुक्रवारबाट प्रदर्शनमा आउन लागेको अभिनेता विपिन कार्की स्टार चलचित्र ‘सेल्फी किङ’ को टिमले गएको माघ ५ गते हाम्रो पात्रो एपसँगको सहकार्यमा ‘हाम्रो सेल्फी किङ कन्टेस्ट’ घोषणा गरेको थियो । ह्यूमर र कमेडी हाउभाउमा खिचिएको सेल्फी हाम्रो कम्युनिटीमार्फत् पोष्ट गरेर प्रतियोगितामा सहभागी हुनसक्ने व्यवस्था गरिएको थियो । गत माघ ५ देखि माघ २० सम्म सञ्चालित प्रतियोगिताको विजेताको घोषणा माघ २१ गते हाम्रो पात्रोमार्फत् गरिएको छ । एपको एजमार्फत् लाइभ आएर अभिनेता विपिन कार्की र निर्देशक विशाल सापकोटाले विजेता घोषणा गरेका हुन् ।

प्रतियोगितामा सहभागीमध्येबाट इटहरीका दिवस पोखरेल विजेता बनेका छन् । उनले कमेडी हाउभाउमा खिचेको सेल्फीले निर्माण पक्षको मन जितेको हो । विजेता दिवसले अनुप बरालको एक्टर्स स्टुडियोमा ३ महिनाको अभिनय तालिमको छात्रवृति पाएका छन् । प्रतियोगिताको विजेता भएपछि दिवसले भनेका छन्, ‘मेरो नाम आउँदा निकै खुसी लाग्यो । बाल्यकालदेखि नै अभिनयमा रुचि थियो । अब, अभिनय सिक्ने सपना फिल्मले पूरा गरेको छ ।’ इटहरीमा रहेका दिवस प्रिमियरमा सहभागी हुन् काठमाण्डौ आउँदैछन् ।

उनीसँगै अन्य १० प्रतियोगीले बुधबार राजधानीमा हुन लागेको चलचित्रको प्रिमियरको १० पास जितेका छन् । दिनेश राउत र सुवास थापाले चलचित्रलाई संयुक्त रुपमा निर्माण गरेका हुन् । विपिनसँगै चलचित्रमा लक्ष्मी बर्देवा, भुवन चन्द, अभय बराल, लोकमणी सापकोटा, सविन बाँस्तोला, कमल देवकोटा, राजेश बिसुराललगायतका कलाकारको अभिनय रहेको छ । भने, अभिनेत्री केकी अधिकारीले ‘जाली रूमाल’ बोलको गीतमा अभिनय गरेकी छिन् । सुसन प्रजापतिले चलचित्र खिचेका हुन् ।