तनहुँ जिल्लाको ऋषिङ गाउँपालिका-४ मधुबनस्थित सडकमा ना.६ त ४२०७ नम्बरको ट्याक्टर अनियन्त्रित भई सडकबाट करिब २५ मिटर तल खसेर बिहीबार बिहान दुर्घटना हुँदा ट्याक्टरमा सवार सोही ठाउँ बस्ने २५ वर्षीय वीर बहादुर बोटेको मृत्यु भएको छ । दुर्घटनामा गम्भीर घाइते भएका उनको वि.पि.कोईराला श्वास प्रश्वास उपचार केन्द्र बेलचौतारामा उपचारको क्रममा मृत्यु भएको हो । साथै दुर्घटनामा घाइते भएका अन्य २ जनाको सोही अस्पतालमा उपचार भईरहेको छ । ट्याक्टर चालकलाई प्रहरीले नियन्त्रणमा लिएको छ ।
त्यसैगरी सर्लाही जिल्लाको रामनगर गाउँपालिका-१ खैर्वास्थित सडकमा बीआर ०५ एम ७८८४ नम्बरको मोटरसाइकल आफैँ अनियन्त्रित भई बिहीबार बिहान दुर्घटना हुँदा मोटरसाइकल चालक सोही ठाउँ बस्ने २५ वर्षीय राजकुमार यादवको मृत्यु भएको छ । दुर्घटनामा गम्भीर घाइते भएका उनको उपचारको लागि स्थानीय मेडिकलतर्फ लैजाने क्रममा बाटोमै मृत्यु भएको हो ।
दुर्घटनाका सम्बन्धमा प्रहरीले थप अनुसन्धान गरिरहेको छ ।