एजेन्सी । भारतमा कोरोनाको कहर चल्दै गर्दा त्यहाँको कमजोर सार्वजनिक स्वास्थ्य प्रणाली पनि उजागर भएको छ ।
यसैबीच उत्तर प्रदेशको कानपुरमा केही चिकित्सकहरूले रोगी भर्ना गर्नका लागि अनुरोध गर्ने परिवारका मानिसलाई लखेटी लखेटी कुटेको खबर आएको छ ।
कानपुरको हैलट अस्पतालमा जुनियर डक्टरहरूले शनिवार भर्ना गराउन आएका परिवारका मानिसलाई लखेटीलखेटी कुटेका हुन् । उनीहरूले रोगीको परिवारको मोबाइल खोसे अनि भर्ना नलिइकनै भगाए ।
रोगीहरू स्ट्रेचरमा छटपटाइरहेका थिए र भर्ना लिनका लागि चिकित्सकहरूसँग अनुनयविनय गरिरहेका थिए ।
चिकित्सकहरूको बदमासीको भिडियो मोबाइलमा रेकर्ड गर्ने मानिससँग मोबाइल खोसेर भिडियो डिलिट गर्न लगाइएको छ । तर केही मानिसको फोनमा बाँकी रहेको भिडियो भाइरल बनिरहेको छ ।
यस विषयमा एम्बुलेन्स चालकहरूसँग कुरा गर्दा उनीहरूले चिकित्सकहरूको गुण्डागर्दीको कुरा बताए । चिकित्सकहरू कोरोना प्रोटोकल सम्झाउँदै थिए अनि आफैं चाहिँ प्रोटोकल तोडेर रोगीको परिवारलाई पिट्दै थिए ।
यसमा जिल्ला प्रशासनले कुनै टिप्पणी गरेको छैन ।
एजेन्सी