जिल्ला प्रहरी कार्यालय मोरङले मोबिल तथा इनामेल कालोबजारी गर्ने एक व्यापारीलाई पक्राउ गरेको छ । विराटनगर महानगरपालिका–११ जनपथ टोलमा गोदाम भाडामा लिई कालोबजारी गर्दै आएका शङ्करलाल खेम्कालाई बिहीबार पक्राउ गरिएको हो ।

प्रहरी प्रवक्ता नायब प्रहरी उपरीक्षक मानबहादुर राईले दिएका जानकारी अनुसार खेम्का विगत २० वर्षदेखि नक्कली मोबिलमा सर्वोको स्टिकर टाँसी बिक्री वितरण गर्दै आइ रहेको छ । गोप्य सूचनाका आधारमा प्रहरीले छापा मार्दा निजलाई पक्राउ परेका हुन् ।

प्रहरीले छापा मार्दा २०० लिटरसहितको १५ वटा ड्रम, २० मोबिलसहितको तीन ड्रम, १० लिटर मोबिलसहितका दुईवटा बाल्टिन, एक लिटर मोबिलसहितको १४ वटा बट्टा, २०० लिटरको खाली ड्रम २४ वटा, सर्वोको स्टिकर १०० थान, सर्वो स्टिकर छाप्ने फर्मा २१ वटा, लिटर मापन गर्ने सामग्री पाँच लिटर नाप्ने एक थान, एक लिटर नाप्ने एक, खाली एक लिटरवाला सर्वोको स्टिकर लगाएको १००, स्टिकर लगाएको एक लिटरको खाली बोतल २०० थान, एशियन पेन्ट्स लेखिएको इनामेल ५०० लिटरको सात बट्टा, एक लिटरवाला दुई थान, सिल्भरको खाली बाल्टिन दुई थान र प्लाष्टिको बाल्टिन थान ३३ बरामद गरेको छ .