सुशान्त सिंह राजपूतको मृत्युपछि बलिउडमा भाइभतिजावाद र भित्रिया र बाहिरियाको बहस चर्किएको छ । यसको असर ‘नेपोकिड्स’ हरुको चलचित्रमा देखिरहेको छ ।
जान्हवी कपूरको ‘गुञ्जन सक्सेना’पछि अब आलिया भट्ट, सञ्जय दत्त, आदित्य राय कपूरको चलचित्र ‘सडक २’ ले मानिसहरुको आक्रोशको सामना गर्नुपरिरहेको छ ।
यो चलचित्र २८ अगस्तमा डिज्नी प्लस हटस्टारमा रिलिज गरिएको छ । यसलाई अहिलेसम्म १.१ रेटिङमात्र मिलेको छ । योसँगै सडक २ अहिलेसम्म सबैभन्दा खराब रेटिङ भएको चलचित्र बनेको छ ।
सडक–२ को रिलिजपछि सबै समालोचकहरुले खराब रिभ्यू दिइरहेका छन् । फिल्मलाई आईएमडीबीमा हालसम्म १३ हजार ४३८ जनाले रेटिङ दिएका छन् । जसमा धेरैले १ रेटिङ दिएका छन् । हालसम्म चलचित्रले १.१ रेटिङ मात्र प्राप्त गरेको छ ।
आईएमडीबीको रेटिङअनुसार अहिलेसम्म सबैभन्दा खराब रेटिङ अजय देवगन र तमन्ना भाटिया अभिनित हिम्मतवालाले १.७ पाएको थियो । त्यस्तै, हमशक्ल र राम गोपाल वर्माको आगले पनि १.७ रेटिङ पाएको थियो ।