कोरोनाभाइरसको कहरका कारण सरकारले ४ महिना अगाडि घोषणा गरेको बन्दाबन्दी (लकडाउन) बुधबारबाट अन्त्य भएको छ । सरकारका प्रवक्ता अर्थ, सञ्चार तथा सूचना प्रविधिमन्त्री युवराज खतिवडाले मंगलबार मध्यरातबाट लकडाउन अन्त्य भएको जानकारी दिएका हुन् । लकडाउनको अत्यसँगै सरकारले धेरै क्षेत्र खुला गरेको छ । त्यसमा चलचित्र क्षेत्र भने परेको छैन । चलचित्रकर्मीहरु भने चलचित्र क्षेत्र पनि खोलिनु पर्ने माग राख्दै आएका छन् । चलचित्र विकास बोर्डका अध्यक्ष दयाराम दाहालले अब चलचित्र क्षेत्र पनि खुल्ने बताएका छन् ।  ‘धेरै क्षेत्र खुलेका छन् । अब चलचित्र क्षेत्र पनि खुल्छन्, ढुक्क हुनुहोस्’ अध्यक्ष दाहाले भने ‘त्यसका लागि अगाडिदेखि नै पहल भएको छ ।’ चलचित्र क्षेत्र खुल्न अब धेरै समय नलाग्ने बताएका दाहालले चलचित्र घर प्रत्यक्ष भीडभाड हुने क्षेत्र भएकोले पनि सरकारले केही ढिलो खोल्न लागेको जानकारी दिए । लकडाउन खुले पनि चलचित्र क्षेत्र मात्र होइन शैक्षिक संस्था, सभा गोष्ठी, प्रदर्शन भेला र सम्मेलन, व्यूटी पार्लर, जिमखाना, हेल्थ क्लब, लगायत प्रत्यक्ष भीडभाड देखिने क्षेत्र भने अझै खुल्न बाँकी रहेका छन् ।