जनस्तरमा तीब्र आलोचना भए पनि कम्युनिस्ट प्रधानमन्त्री केपी शर्मा ओली नेतृत्वको सरकारको ‘प्यारो’ र्यापिड डायग्नोस्टिक टेस्ट (आडीटी) किटले फेरि ठूलो धोका दिएको छ ।
धादिङमा आरडीटी नेगेटिभ आएर घर पठाइएका २१ जनामा कोरोना भाइरस संक्रमण पुष्टि भएको छ । जिल्लाको निलकण्ठ नगरपालिकाले भारतबाट फर्किएर १४ दिन क्वारेन्टाइनमा बसेका व्यक्तिलाई आरडीटी परीक्षण गरेर नेगेटिभ आएपछि घर पठाएको थियो ।
घर गएको केही दिनपछि स्वाब संकलन गरेर पीसीआर जाँच गर्दा २१ जनामा संक्रमण पुष्टि भएको मेयर भीम ढुंगानाले बताएका छन् ।
‘त्यतिबेला पीसीआर टेस्टका किटको अभाव रहेकाले आरडीटी गरेर पठाएकोमा किट आएपछि स्वाब संकलन गरेर परीक्षण गर्दा संक्रमण पुष्टि भएको छ,’ उनले भने ।
संक्रमण पुष्टि हुने व्यक्तिमा नगरपालिकाको वडा नम्बर ७ र १४ धुवाँकोटका ७/७ जना, वडा नम्बर १ का ६ जना र वडा नम्बर ४ का १ जना रहेका छन् ।
अब संक्रमितको परिवारका सबै सदस्यको पीसीआर जाँच गरिने मेयर ढुंगानाले बताएका छन् ।