भारतका पूर्व प्रधानमन्त्री मनमोहन सिंहको नयाँदिल्लीस्थित निवास ‘मोतीलाल नेहरू प्यालेस’ बाहिर कोभिड–१९ को क्वारेण्टिन सम्बन्धी सूचना टाँसिएको छ ।
समाचारमा जनाइएअनुसार सिंहको निवासमा बस्दै आएकी एकजना घरेलु सहयोगीकी छोरीको कोभिड परीक्षणमा पोजेटिभ देखिएपछि पूर्व प्रधानमन्त्रीलाई घरभित्रै बस्न सूचना टाँसिएको हो ।
हाल सिंह र परिवारलाई निवासभित्रको मुख्य भवनमा र घरेलु सहयोगीलाई कम्पाउण्डभित्रको क्वार्टरमा छुट्टाछुट्टै राखिएको छ । केही समय अघिसम्म अस्वस्थ सिंह पछिल्ला दिनदेखि बिस्तारै सक्रिय जीवनमा फर्कन थालेका थिए । उनले गत बिहीबार भिडियो कन्फरेन्सबाट पार्टीको परामर्श समितिको बैठकमा समेत भाग लिएका थिए ।