नेपालमा कोरोनाभाइरस संक्रमितको संख्या १२ पुगेको छ । पर्साको वीरगन्ज महानगरपालिका वडा नम्बर २ को छपकैया स्थित मस्जिदमा बस्दै आएका ३ जनामा कोरोनाभाइरसको पुष्टि भएसँगै संक्रमितको संख्या १२ पुगेको हो ।

संक्रमति तीन जना वर्ष ३७, ५५ र ४४ पुृरुष रहेको उनीहरुलाई कोरोनाको आशंकामा नारायणी अस्पताल वीरगन्जको आईसोलेशनमा राखिएकोमा नमुना कीटजन्य रोग अनुसन्धान तथा तालीम केन्द्र, हेटौडा र केन्द्रीय प्रयोगशाला टेकुमा परीक्षण गर्दा कोरोना पोजेटिभ पाइएको स्वास्थ्य तथा जनसंख्या मन्त्रालयले जनाएको छ ।

यसअघि कोरोना संक्रमण पुष्टि भएका ८ जनाको अहिले विभिन्न अस्पतालमा उपचार भइरहेको छ । ४ जनाको सेती अस्पताल, २ जनाको बागलुङ र बाँकी २ जनाको टेकुमा उपचार भइरहेको हो। उनीहरुको अवस्था सामान्य रहेको बताइएको छ ।

यसैबीच सुरुमा संक्रमण पुष्टि भएका एक जना बिरामी भने यसअघि नै निको भएर घर फर्किसकेका छन् ।