सरकारले सवारी साधनबाट काठमाडौं बाहिर जान शुक्रबार र शनिबार दुई दिन अनुमति दिने भएको छ ।
अचानक भएको लकडाउनका कारण चाहेर पनि उपत्यका छाड्न नसकेकाहरुका लागि सरकारले त्यस्तो व्यवस्था गर्न लागेको हो ।
कोरोना रोकथाम तथा नियन्त्रण समन्वय उच्चस्तरीय समितिका संयोजकसमेत रहेका उपप्रधान तथा रक्षामन्त्री ईश्वर पोखरेलले समितिका सदस्यरहेका सरोकारवाला मन्त्री र निकायहरुसँग बिहीबार सिंहदरवारमा छलफल गरेका थिए ।
यात्रुहरुलाई राजधानी पठाउने व्यवस्था र मोडालिटीबारे गृह मन्त्रालयले अहिले तयारी गरिरहेको छ ।
सरकारले गत ११ गते बिहान ६ बजेदेखि लागू गरेको लकडाउन अहिले तेस्रो सातामा चलिरहेको छ । लकडाउन लम्बिरहँदा राजधानीमा जीवनयापन गर्न कठीन भएका दैनिक तथा ज्यालादारी मजदुरहरु हिँडेरै घर जान थालेपछि सरकारले नयाँ निर्णय गरेको हो ।
मंगलबार देशबासीका नाममा सम्बोधन गर्दै प्रधानमन्त्री केपी शर्मा ओलीले लकडाउनको अवधि कम्तिमा अरू दुई साता लम्बिन सक्ने संकेत गरेका थिए ।