नेपाल पर्वतारोहण सङ्घले नेपाल सरकारले स्थापना गरेको ‘कोरोना भाइरस सङ्क्रमण रोकथाम, नियन्त्रण तथा उपचार कोष’मा रु पाँच लाख सहयोग गर्ने भएको छ ।
सङ्घका अध्यक्ष सन्तवीर लामाले आज एक विज्ञप्ति जारी गरी कोरोना भाइरस सङ्क्रमण तथा रोकथामका लागि सरकारलाई उक्त रकम सहयोग गर्न लागेको जानकारी दिनुभयो । “सहयोग रकमले कोरोना भाइरस रोकथाम, नियन्त्रण तथा उपचारका साथै पर्यटनको क्षेत्रमा रहेका विपन्न र न्यून आय भएका प्रभावित परिवारको दैनिक आवश्यक एवम् उपभोग्य सामग्रीका निम्ति सहयोग पुग्नेछ”, विज्ञप्तिमा भनिएको छ ।
विश्वव्यापी महामारीका रुपमा फैलिएको नोबेल कोरोना भाइरस (कोभिड–१९) रोगको सङ्क्रमणलाई फैलन नदिन तथा रोकथाम एवम् नियन्त्रणका लागि सरकारले राष्ट्रिय वाणिज्य बैंक सिंहदरबार शाखाको खाता नं १९६०००००११०१ मा उपचार कोष स्थापना गर्दै रकम जम्मा गर्न अपिल गरेको छ ।