ताप्लेजुङ — गत मङ्सिरको अन्तिम सातादेखि बन्द रहेको ७३ मेगावाट क्षमताको सानिमा मिडल तमोर जलविद्युत् आयोजनाले पुनः विद्युत् उत्पादन सुरु गरेको छ।

पावरहाउससहित केही उपकरणमा देखिएको प्राविधिक समस्या समाधान भएपछि उत्पादन पुनः सुरु गरिएको आयोजना कार्यालयका प्रशासन प्रमुख तथा वातावरण अधिकृत करण गौतमले जानकारी दिए। उनका अनुसार समस्या देखिएकै समयमा प्रत्येक वर्ष गरिनुपर्ने नियमित मर्मतसम्भारको काम पनि एकैसाथ सम्पन्न गरिएको हो।

करिब दुई वर्षअघि व्यावसायिक उत्पादन थालेको यस आयोजनाबाट उत्पादित विद्युत् वसन्तपुर सबस्टेसनमार्फत केन्द्रीय प्रसारण लाइनमा जोडिएको छ। सानिमा मिडल तमोर ताप्लेजुङमा सञ्चालनमा रहेका जलविद्युत् आयोजनामध्ये सबैभन्दा ठूलो क्षमताको आयोजना हो।