काठमाडौँ । स्थानीय बजारमा बुधबार सुनको मूल्यमा गिरावट आएको छ। मंगलबारको तुलनामा बुधबार सुनको मूल्य प्रतितोला १ हजार १०० रुपैयाँले घटेको हो। यसअघि मंगलबार पनि सुनको मूल्यमा उल्लेखनीय गिरावट देखिएको थियो।

नेपाल सुनचाँदी व्यवसायी महासंघका अनुसार बुधबार छापावाल सुनको मूल्य प्रतितोला २ लाख ६१ हजार रुपैयाँ कायम भएको छ। मंगलबार सुनको मूल्य २ लाख ६२ हजार १०० रुपैयाँ रहेको थियो भने सोमबार २ लाख ७० हजार रुपैयाँ थियो। आइतबार भने सुनको मूल्य प्रतितोला २ लाख ७० हजार ६०० रुपैयाँ पुगेको थियो, जुन हालसम्मकै उच्च मूल्य मानिएको थियो।

यसैगरी, बुधबार चाँदीको मूल्य पनि घटेको छ। मंगलबार प्रतितोला ४ हजार ९५० रुपैयाँ रहेको चाँदी बुधबार घटेर ४ हजार ४७० रुपैयाँमा कारोबार भइरहेको महासंघले जनाएको छ।

अन्तर्राष्ट्रिय बजारमा हुने उतारचढावका कारण सुनचाँदीको मूल्य स्थानीय बजारमा पनि दैनिक रूपमा परिवर्तन हुँदै आएको छ।