काठमाडौँ । नेपाल राष्ट्र बैंकले बैंकिङ प्रणालीमा बढ्दो तरलता व्यवस्थापन गर्न आज अतिरिक्त ४० अर्ब रुपैयाँ निक्षेप संकलन (Deposit Collection) मार्फत उठाउने भएको छ। बजारमा अत्यधिक तरलता बढेपछि यो कदम उठाइएको हो।

राष्ट्र बैंकले ३५ दिन अवधिका लागि निक्षेप संकलन गर्ने जनाएको छ। यसका लागि आज दिउँसो ३ बजेसम्म बोलकबोल (bidding) गर्न सकिनेछ।

बोलकबोलका लागि न्यूनतम रकम १० करोड रुपैयाँ निर्धारण गरिएको छ भने अधिकतम सीमा कुल आह्वान रकमसम्म खुला रहनेछ, तर बोलकबोल रकम ५ करोडले विभाज्य हुनुपर्नेछ।

सावाँ तथा ब्याज भुक्तानी आगामी पुस १० गते तोकिएको छ। यसमा लगाइने ब्याजदर पनि बोलकबोल प्रक्रियामार्फत निर्धारण हुनेछ। राष्ट्र बैंकका अनुसार निक्षेप संकलन उपकरणमा बहु-ब्याजदरका आधारमा बहु-बोलकबोल गर्न सकिनेछ।

यस प्रक्रियामा नेपाल राष्ट्र बैंकबाट इजाजतपत्रप्राप्त
‘क’, ‘ख’ र ‘ग’ श्रेणीका बैंक तथा वित्तीय संस्थाहरू मात्र सहभागी हुन पाउनेछन्।