हिपमत डटकम
पोखरा । नेपाली कम्युनिस्ट पार्टी (नेकपा) ले पोखराको मानवअधिकार चोकमा गर्न लागेको एकता सभाविरुद्ध स्थानीय व्यापारीहरू आन्दोलित बनेका छन्। सभाले व्यापारमा ठूलो असर पर्ने भन्दै उनीहरूले पर्चा–पम्प्लेटसहित विरोध जनाएका छन्।
व्यापारीहरूले “गरी खान देऊ” भन्ने माग राख्दै सभा रोक्न आग्रह गरेका छन्। पोखराको ट्रेडमलका व्यवसायी नवराज त्रिपाठीले सडकमा सभा गर्न अनुमति दिने जिम्मेवार निकायविरुद्ध कारबाहीको माग समेत गरेका छन्।
‘सडकमा हुने जुलुस–सभा र प्रदर्शनले व्यापार चौपट भइरहेको छ,’ त्रिपाठीले भने, ‘वर्षौंदेखि माग राख्दा सुनुवाइ भएको छैन।’
त्यसैगरी, चिप्लेढुंगा–सिद्धार्थचोक व्यवसायी समितिका अध्यक्ष दुर्गा सुनारले केही रकमका लागि सडक नै ‘बेचिएको’ आरोप लगाए। उनले व्यवसायीको हित नहेरी सडक उपलब्ध गराउँदा निरन्तर मन्दी खेप्नु परेको बताए।
‘४ घण्टा सडक बन्द हुँदा कति नोक्सान हुन्छ सोच्नेसमेत कसैले गरेन,’ सुनारले भने। व्यापारीहरूले मेयर धनराज आचार्यप्रति पनि असन्तुष्टि व्यक्त गरेका छन्।
यसअघि पनि व्यवसायीहरूले महानगरलाई ज्ञापनपत्र बुझाएर सो क्षेत्रमा कार्यक्रम नगरिदिन पटक–पटक आग्रह गरेका थिए तर सुनुवाइ नभएको उनीहरूको भनाइ छ। नेकपाको सभामा पार्टी संयोजक पुष्पकमल दाहाल ‘प्रचण्ड’, सह–संयोजक माधवकुमार नेपाललगायत शीर्ष नेताले सम्बोधन गर्ने कार्यक्रम रहेको छ।
व्यापारीहरूको विरोधका कारण केही समय नेकपा कार्यकर्तासँग भनाभन समेत भएको बताइएको छ। विरोधस्वरूप स्थानीय व्यवसायीहरूले आफ्नो सटर समेत बन्द गरेका छन्।
१.
२.
३.
