सुनिल स्मृति साहित्य महोत्सवका संयोजक जनक घर्तिमगरको सभापतित्वमा सुरु भएको कार्यक्रममा प्रमुख अतिथिको भूमिकामा नेपालको सङ्घीय संसदअन्तर्गत प्रतिनिधिसभाका पूर्व सभामुख तथा प्रतिनिधिसभा सदस्य कृष्णबहादुर महराको प्रमुख आतिथ्यता रहेको थियो । महोत्सवको पहिलो दिन ३ वटा बहस सेसन (कविले बिराएको बाटो, सुनिलको सपना, सिनेमामा छुटेको भूगोल) प्रस्तुत भएको छ ।

प्रमुख अतिथि महराले रोल्पामा साहित्यिक महोत्सव हुनु गर्वको कुरा रहेको बताए । महराले साहित्यसँग जोडिएको आफ्नो किस्सा समेत सुनाए । आफू २३ वर्षको हुँदा रोल्पाबाट साहित्यिक पत्रिका ‘हटारु’ ’निकालेको बताए । नुन बोक्ने हटारुको नामबाट ०३८ सालमा सो पत्रिका निकालिएको बताए ।

उनले कार्यक्रममा ‘जनतालाई’ शीर्षकको एक कविता पनि सुनाए । यस कविता लेखेपश्चात आफूलाई सिडीओले र्याखर्याख्ती पारेको समेत उनले बताए ।

उठ ए जनता हो
अझै लाटा भएर नबस
तिमीलाई मृत्युको मुखतिर धकेलिदैछ
तिमीमाथि यहा
मासुको भतेर लगाउने षणयन्त्र रचिदै छ
(कवितांश)

स्थानीय प्रतिभाहरूलाई अगाडि बढाउनुपर्ने महराको जोड थियो । ‘साहित्य भनेको समाजको चेतनालाई परिवर्तन गर्ने माध्यम रहेकाले यसप्रकारको कार्यक्रम हुनु गौरवको कुरा भएको उनले बताए । “ रोल्पामा सबैभन्दा धेरै व्यक्तिहरूको सहादत प्राप्त गर्नुभएको छ । हामीले जनयुद्ध गर्यौँ, ध्वंस गरौँ । निर्माण गरेर देखाउने जिल्ला पनि रोल्पा नै हो ।”, महराले अगाडि भने, “हामीले युद्धमा केके ध्वंस गरौँ, त्यसपछि केके निर्माण गर्यौँ, त्यसको उत्खनन गर्ने काम साहित्यीककर्मीहरूको हो । युद्धपश्चात यहाको मनोसामाजिक अवस्था कस्तो छ, त्यसको यथार्थ चित्रण यहाँ आइपुग्नु भएका साहित्यकर्मीहरूले गर्नुहोस् भन्ने मेरो आग्रह छ ।”

महराले आफू पहिलोपटक सञ्चारमन्त्री (०६४) हुँदा मोबाइल नभएको प्रसंग उप्काउँदै भने, “अहिले हातहातमा मोबाइल छ । रोल्प्मा सडक विस्तार र उर्जा विकासमा वृद्धि भएको छ ।” रोल्पा विकासोन्मुख हुँदै गएको महराको जिकिर थियो । महराले आफूले जिल्लाका ५१ वटै गाउँ पैदल हिडेको बताउँदै आफूले रोल्पा के चाहन्छ भन्ने कुरा बुझेको र त्यसतर्फ आफू अग्रसर भएको समेत बताए ।

“रोल्पा लुकेको जिल्ला हो । यहाँ जति पस्यो, उति रमाइलो छ । रोल्पाको उत्खनन पनि साहित्यकर्मीहरूबाट होओस् भन्ने मेरो चाह छ”, उनले अगाडि भने,” ‘यहा ध्वंस मात्रै छ भन्ने संदेश बाहिर नजाओस भन्ने कामना छ ।” कथा, कविता, गीत, फिल्म, नाटकमार्फत लुकेको रोल्पा बाहिर आउने कुरामा यस कार्यक्रमपश्चात् आफू विश्वस्त भएको उनले बताए ।

सुनिल स्मृति गाउँपालिकाको केन्द्र ‘सुलीचौर’ मा आयोजित यस कार्यक्रमको नियत भाले जुधाउने नभई रोल्पालाई केन्द्रमा राखेर राष्ट्रिय बहस गर्नु नै रहेको आयोजकको टिप्पणी थियो । कार्यक्रमको प्रक्रियामाथि समस्या आए पनि कार्यक्रमको नियतमाथि आक्रमण हुनु राम्रो नभएको आयोजकले जिकिर गरेको छ ।

रोल्पाको सुलिचौरमा ‘समाजका लागि शब्द’ भन्ने स्लोगोनका साथ् सुरु भएको साहित्य महोत्सव आइतबारसम्म चल्नेछ ।