लमजुङ, मर्स्याङ्दी गाउँपालिका-२ घनपोखरा धिम्राङखोलास्थित सडकमा ग.१ त ६११४ नम्बरको ट्याक्टर अनियन्त्रित भई सडकबाट करिब २ सय मिटर तल खसेर सोमबार साँझ दुर्घटना हुँदा चालक सोही गाउँपालिका-९ सिमपानी बस्ने २४ वर्षीय सन्देश बिकको घटनास्थलमै मृत्यु भएको छ ।

त्यसैगरी ललितपुर, गोदावरी नगरपालिका-११ चापागाउँ शेराफाटमा ना.८ ख ८०९१ नम्बरको टिपर सोमबार राति दुर्घटना हुँदा चालक ललितपुर गोदावरी नगरपालिका-७ बुरुङचुल्ली बस्ने ३० वर्षीय अजय मार्फा (तामाङ)को मृत्यु भएको छ । उक्त टिपर मानिस हिड्ने फलामको पुलमा ठोकिएर पुलको भाग खसी टिपरलाई थिच्दा गम्भीर घाइते भएका उनको नख्खुस्थित नेपाल मेडिसिटी अस्पतालमा उपचारको क्रममा मृत्यु भएको हो ।

त्यसैगरी मकवानपुर, हेटौंडा उपमहानगरपालिका-१६ सिपाली चोकमा अनटेष्ट लेखिएको स्कुटर अनियन्त्रित भई सोमबार राति दुर्घटना हँदा स्कुटरमा सवार सोही ठाउँ बस्ने २५ वर्षीय सुमन बयलकोटीको मृत्यु भएको छ । दुर्घटनामा गम्भीर घाइते भएका उनको हेटौंडा अस्पतालमा उपचारको क्रममा मृत्यु भएको हो । स्कुटर चालकलाई प्रहरीले नियन्त्रणमा लिएको छ ।

दुर्घटनाका सम्बन्धमा प्रहरीले थप अनुसन्धान गरिरहेको छ ।