आइतबार सल्यानको कपुरकोटमा भएको बस दुर्घटनामा परि १२ जनाको मृत्यु भएको छ । बस सडकबाट २०० मिटर तल थारखोलामा खसेको थियो ।

मृत्यु हुनेमा १० जना पुरुष र २ जना महिला रहेको प्रहरीले जनाएको छ । जिल्ला प्रहरी प्रमुख डीएसपी गोविन्द थापाका अनुसार ६ जनाको घटना स्थलमा र ६ जनाको उपचारको क्रममा अस्पतालमा मृत्यु भएको हो ।

सल्यान खलंगादेखि दाङको तुलसीपुर जाँदै गरेको रा १ ख २५५२ नम्बरको बस आइतबार बिहान कपुरकोट गाउँपालिका ५ थारखोलामा दुर्घटना भएको थियो । तीव्र गतिका कारण दुर्घटना भएको प्रहरीले जनाएको छ ।

घाइतेमध्ये गम्भीर अवस्थाका ७ जनालाई उपचारका लागि नेपालगञ्ज पठाइएको छ । अरु घाइतेको श्रीनगर र खलंगाका विभिन्न अस्पतालमा उपचार भइरहेको डीएसपी थापाले जानकारी दिए ।