रिपोर्टरको कूनो
साउन १६ गते शनिबार । सार्वजनिक स्थायी विदाको यो दिन सेल्फी रोड पथरीशनिश्चरेमा कतिलाई सामान्य लाग्ने तर, यथार्थमा सरकारी साधनको दुरूपयोग, दोहन भएको दृश्यले ध्यान आकृष्ट ग¥यो ।
सरकारी नं. प्लेटको गाडीमा ६ जना सवार थिए । सम्भवतः उनी कुनै कार्यालयको कर्मचारी हुनुपर्छ । उनले गाडीमा श्रीमति, छोराछोरी र दुई बूढाबूढी (आमाबाबु वा सासु ससुरा पनि हुनसक्छन) लाई सयर गराउन लगेका रहेछन् । गाडी राजमार्गमै राखेर यो परिवार सेल्फी रोडतर्फ हानियो । श्रीमति र छोराछोरीले टिकटक बनाउन थाले । फोटो खिचे । लगभग २ घण्टा उनीहरू त्यहाँ बसे ।
विदाको दिन यसरी सरकारी गाडी परिवारका हकमा प्रयोग गर्न पाइन्छ ? मोरङ प्रशासन कार्यालयसित सरकारी अड्डामा कति गाडी छन् ? विदाको दिन कसले चलाउँछ भन्ने जानकारी राख्नुपर्ने हो । तर, भइरहेको रहेनछ । मनमा खेल्यो–यसमा मैले तिरेको करको पनि डिजेल छ, लगानी छ । मैले केही बोल्नुपर्छ ।
सिडिओ साब्लाई फोन गरेको उठाएनन् । ५ पटक गर्दा पनि उठाएनन् । मैले त्यो गाडीको तस्वीर पनि खिचेको छु । यो कुनोमा कुरा आएपछि फोटो मागिन सक्छ तर, फोन नै नउठाउने प्रमुख जिल्ला अधिकारीलाई दिएर किन सहयोग गर्ने ?
शनिबार केही पर्यटकीय क्षेत्रको अवलोकन, अनुगमन गर्ने हो भने यथेष्ट प्रमाण भेटिन्छ ।
यो खबर आजको न्यु सृष्टि दैनिक पत्रिकामा प्रकाशित छ।