विराटनगर निवासी अखिल नेपाल फुटबल संघ (एन्फा) का सहायक महासचिव वसन्त अर्यालले राजिनामा दिएका छन् ।
एन्फा आन्तरिक विवाद बढ्दै गएपछि र मनोनितको पद खारेज गर्ने विधान पारित भएपछि अर्यालको राजिनामा आएको हो । पछिल्लो समय मुख्य प्रशिक्षक अबदुल्लाह अलमुताइरीको राजीनामा प्रकरण र उपाध्यक्ष पंकज नेम्वाङको विवादले माहोल तातिएको छ ।
अर्यालले एन्फा अध्यक्ष कर्माछिरिङलाई सम्बोधन गर्दै पदबाट अलग रहने भन्दै राजिनामा बुझाएका छन् । अर्यालले ०७७ माघ २६ गते काठमाडौंमा सम्पन्न साधारणसभाले विधान संशोधन गरी मनोनित पद खारेज गरेकोले पदमा रहिरहन विधानत नैतिक संकट परेको हुँदा र अध्यक्षलाई विधानअनुसार काम गर्न सजिलो होस् भनेर पदकबाट अलग रहने घोषणा गरेको बताए ।
एन्फा विवाद चुरोट प्रकरणसित पनि गाँसिएकोछ । केही दिन अघि एन्फा कम्प्लेक्समा प्रशिक्षक अलमुताइरीले सिगरेट उडाउँदै थिए । यो देखेर एक खेल पत्रकारले ‘नेपालको सार्वजनिक स्थानमा यसरी सिगरेटको धुँवा उडाउन पाइन्न’ भनिन । अलमुताइरीले पत्रकारलाई अश्लिल शब्द प्रयोग गर्दै गाली गरे । यसको समाचार आयो र, समाचारलाई उपाध्यक्ष नेम्वाङले लाइक गरे । त्यसपछि विवाद बढ्दै गयो । सोमबार एन्फा प्रवक्ताले समेत राजिनामा दिएका छन् ।