हिपमत डटकम
अन्तरिक्षमा आफ्नो स्थायी केन्द्र बनाउने तयारी गरिरहेको चीनले उक्त स्टेशनको एक महत्वपूर्ण मोड्युल लञ्च गरेको छ ।
तियान्हे नामक उक्त मोड्यूलमा अन्तरिक्ष स्टेशनमा काम गर्ने सबै अन्तरिक्षयात्रीको बस्ने कक्ष बनाइ रहेको छ ।
वेनचांग स्पेस लञ्च सेन्टरबाट उक्त यानलाई लंगमार्च ५ बी रकेटमा राखेर प्रक्षेपण गरिएको हो ।
आफ्नो स्थायी स्पेस स्टेशन सन् २०२२ सम्म बनिसक्ने विश्वास चीनको छ ।
अन्तरिक्षमा अहिले पृथ्वीको कक्षमा एउटा मात्र स्पेस स्टेशन रहेको छ, जसको नाम इन्टरनेशनल स्पेश स्टेसन हो । त्यसमा चीनलाई सामेल गरिएको छैन ।
अन्तरिक्ष विज्ञानको क्षेत्रमा चीन ढिलो गरी प्रवेश गरेको हो । उसले पहिलोपटक सन् २००३ मा आफ्ना अन्तरिक्षयात्रीलाई पृथ्वीको कक्षमा पठाएको थियो । यद्यपि अन्तरिक्षमा मानिसलाई पठाउने मुलुकमा रुस र अमेरिका पछि चीन तेश्रो देश थियो ।
स्पेस स्टेशन के मॉड्यूल को लेकर रवाना होनेवाला लॉन्ग मार्च-5 बी वाई2 रॉकेट
अहिलेसम्म चीनले दुईवटा स्पेस सेन्टर तियाङगङ्ग १ र तियाङगंग २ पृथ्वीको कक्षमा प्रक्षेपण गरिसकेको छ । यद्यपि, ती दुवै ट्रायलको रुपमा पठाइएको स्पेस स्टेसन थिए, जुन पृथ्वीको कक्षमा थोरै समय मात्र रहन सके ।
नयाँ स्पेस स्टेशन तियान्हे चाँहि कम्तिमा १० वर्षसम्म पृथ्वीको कक्षमा रहेर कार्य गर्ने बताइएको छ ।
चीनले सन् २०२२ सम्ममा १० वटा यस्ता मोड्युल लञ्च गर्नेछ जसले ३४० देखि ४५० किलोमिटरको उचाइबाट पृथ्वीको परिक्रमा गर्नेछन् ।
हाल पृथ्वीको कक्षमा इन्टरनेशनल स्पेस स्टेसनले परिक्रमा गरिरहेको छ । उक्त स्टेसनमा अमेरिका, रुस, क्यानडा, युरोप र जापानको संलग्नता छ । उक्त स्टेसनमा सामेल हुनमा चीनमाथि रोक लगाइएको छ ।
हालको अन्तर्राष्ट्रिय अन्तरिक्ष स्टेसनले आगामी सन् २०२४ देखि काम गर्न छाड्नेछ । त्यसबेला सायद चीनको तियान्हे नै एकमात्र कामकाजी स्पेस स्टेशनको रुपमा पृथ्वीको कक्षमा रहनेछ ।
चीनको अन्तरिक्ष योजना
उक्त मोड्युल प्रक्षेपण गर्नुभन्दा १ महिना अगाडि नै चीन र रुसले एक आपसमा सहकार्य गरी चन्द्रमाको सतहमा एक अन्तरिक्ष केन्द्र बनाउने घोषणा गरेका थिए ।
चीनको अन्तरिक्ष योजनाहरुका बारेमा जानकारी राख्ने चेन लेनले समाचार एजेन्सी एएफपीलाई बताए अनुसार रुसको साथमा चीन जोडिनु र उक्त परियोजना आफैमा एक ठूलो कुरा हो । त्यो चीनका लागि सबैभन्दा ठूलो अन्तर्राष्ट्रिय अन्तरिक्ष सहयोग परियोजना हुनेछ।
उसो त अन्तरिक्ष अनुसन्धानको अगुवा रुसलाई पछिल्ला वर्षहरुमा अमेरिका र चीनले पछि पारिरहेका छन् । अघिल्लो वर्ष स्पेस एक्सले अन्तरिक्ष यात्रीलाई सफलतापूर्वक अन्तरिक्षमा पठाएसँगै अन्तरिक्षयात्री प्रक्षेपणमा रुसी एकाधिकार पनि तोडियो ।
पछिल्ला वर्षहरुमा चीनले अन्तरिक्ष योजना सम्बन्धी आफ्ना महत्वाकांक्षाहरु सार्वजनिक रुपमै व्यक्त गरिरहेको छ । चीनले आफ्ना अन्तरिक्ष परियोजनाहरुमा निर्धक्क लगानी पनि गरिरहेको छ ।
चिनियाँ राष्ट्रपति सी जिनपिंगले पनि अन्तरिक्षसँग सम्बन्धित गतिविधिहरुलाई पूर्णरुपमा समर्थन गर्ने गरेका छन् र चीनका सरकारी सञ्चार माध्यमहरु पनि स्पेस ड्रिम परियोजना देशलाई पूर्णरुपमा बदल्ने कदम भएको बताउँदै आएका छन् ।
१.
२.
३.
