शेरबहादुर परियार, पोल्याण्ड । पोल्याण्डमा सन् २०१८ डिसेम्बर २६ मा नेपाली व्यवसायीको हत्या गर्ने २ भारतीयलाई यहाँको अदालतले दोषी ठहर गरेको छ।

नेपाली व्यवसायी ३७ वर्षीय इश्वर श्रेष्ठलाई आफ्नै एभरेष्ट रेस्टुरेन्टमा काम गर्ने दुई भारतीय नागरिकले हत्या गरेको प्रहरी अनुसन्धानले प्रमाणित गरेको छ । वारसास्थित प्रागा जिल्ला अदालत समक्ष हत्याको आरोप स्वीकारेपछि अदालतले उनीहरूलाई क्रमश: १० वर्ष र ८ वर्षको जेल सजाय सुनाएको हो।

कामदार र मालिक बिच भएको आन्तरिक बिबादका कारण श्रेष्ठलाई ती दुई भारतीयले गलबन्दीले घाटीमा बेरेर हत्या गरेको र हत्या पछि स्वयं श्रेष्ठको टाेयाटा कारमा शव राखेका थिए। प्रहरीले श्रेष्ठको शव ३ दिन पछि सन् २०१८ को डिसेम्बर २९ तारिख स्थानीयको सहयोगमा फेला पारेको थियो।