प्रधानमन्त्री केपी शर्मा ओलीले प्रचण्ड–नेपाल समूहका केन्द्रीय सदस्यदेखि सांसदहरु समेतलाई हटाइदिने चेतावनी दिएका छन् । उनले नियुक्ति दिनेले बदर पनि गरिदिन सक्ने भन्दै अहिलेसम्म आफूले देव गुरुङबाहेक कसैलाई नहटाएको र आवश्यक परे सबैलाई हटाइदिन सक्ने चेतावनी दिएका छन् ।

सोमबार पोखरामा आफू पक्षीय नेकपाको गण्डकी प्रदेशस्तरीय भेलालाई सम्बोधन गर्दै पार्टी एकताका क्रममा आफूले सबैलाई भागबण्डाको आधारमा नियुक्ति दिएकाले ती सबैलाई ‘नियुक्ति गर्नेले हटाउन पनि सक्ने’ बताए ।

उनले पार्टी कब्जा गर्ने, आन्दोलन बिगार्ने र देशमा कम्फर्टेबल सरकार बनाउन प्रचण्ड नेपाल लागिपरेको भन्दै उनीहरुले देश र जनताको लागि नभइ कसैको लागि कन्फर्टेबल हुने सरकार चाहेको आक्रोश पोखे । ओलीले अल्पमत र बहुमतको कुनै हिसाव नगरी पार्टी एकताका बेलामा प्रचण्ड–नेपाल समूहलाई भाग दिएको दावी समेत गरे ।

भेलालाई सम्बोधन गर्दै ओलीले नेकपा प्रचण्ड–नेपाल समूहको चर्को आलोचना गर्दै, प्रचण्ड–नेपाल समूहले कारबाहीको जेजति ‘तमासा’ गरेपनि आफू पार्टीमा आधिकारिक रहेको भन्दै विधिवत् रुपमा अध्यक्ष र संसदीय दलको नेता फेर्न समेत चुनौति दिए ।