रोबर्ट लेवान्डोस्कीले जर्मन बुन्डेस लिगामा गर्ड मुलरले बनाएको ४२ वर्ष पुरानो गोलको कीर्तिमान तोडेका छन् । एससी फ्रीबर्गविरुद्ध बायर्नलाई जीत दिलाउने क्रममा गोल गर्दै लेवान्डोस्कीले सो कीर्तिमान बनाएका हुन् ।

लिगको पहिलो हाफमा मुलरले बनाएको १६ खेलपछि २० गोलको कीतिमानलाई लेवान्डोस्कीले तोड्न सफल भएका छन् । उनले १६ खेलमा २१ गोल गरिसकेका छन् ।

पोल्याण्डका खेलाडीले गत सिजन बायर्नलाई ट्रेबल जित्न महत्त्वपूर्ण भूमिका खेलेका थिए । उनले यस क्रममा ४७ खेलमा ५५ गोल गरेका थिए । यसमध्ये ३४ गोल उनले जर्मनीको लिगमा गरेका थिए ।

३२वर्षीय खेलाडी एक गोलले लाजियोका सिरो इमोबाइलसँग पछि पर्दै युरोपीयन गोल्डन शु जित्नबाट भने वञ्चित रहेका थिए । यो सिजन पोलिस खेलाडी यो रेसमा सबैभन्दा अगाडि रहेका छन् ।

गत सिजन उत्कृष्ट प्रदर्शन गरेबापत् उनले वर्षको उत्कृष्ट पुरुष खेलाडीका रुपमा फिफा द बेस्ट मेन्स प्लेयर अवार्ड पनि जितेका थिए ।