एजेन्सी– करिब तीन महिनादेखि पाकिस्तान र अफगानिस्तानबीचको प्रमुख व्यापार कोरिडोर बन्द रहँदा राष्ट्रिय तथा क्षेत्रीय स्तरमा अरबौँ रुपैयाँ बराबरको आर्थिक क्षति भएको एक प्रतिवेदनले देखाएको छ।

सीमापार व्यापार अवरुद्ध हुँदा निर्यात, आपसी वाणिज्य, यातायात र भन्सार राजस्वमा गम्भीर असर परेको छ। यसको प्रत्यक्ष प्रभाव खैबर पख्तुनख्वा प्रान्तमा परेको छ, जहाँ व्यापारीहरू अफगानिस्तानसँगको व्यापारमा ठूलो मात्रामा निर्भर थिए।

पाकिस्तान–अफगानिस्तान जोइन्ट चेम्बर अफ कमर्स एन्ड इन्डस्ट्रिजका वरिष्ठ उपाध्यक्ष जियाउल हक सरहदी र सरहद चेम्बर अफ कमर्स एन्ड इन्डस्ट्रिजका सदस्य मञ्जुर इलाहीले संयुक्त प्रेस विज्ञप्तिमार्फत सीमाबन्दीका कारण अर्थतन्त्रमा गहिरो धक्का लागेको बताएका छन्।

उनीहरूका अनुसार अफगानिस्तानमा हुने पाकिस्तानको ९० प्रतिशतभन्दा बढी निर्यात खैबर पख्तुनख्वाका नाकाबाट, विशेषगरी तोरखाम सीमा हुँदै हुने गर्दछ। सीमा बन्द भएपछि सिमेन्ट, कपडा, औषधि, निर्माण सामग्री र कृषि उत्पादनको निर्यात रोकिँदा मात्रै करिब २.५ अर्ब रुपैयाँ बराबरको घाटा भएको अनुमान गरिएको छ।

यसका अतिरिक्त, व्यापार गतिविधि घट्दा र भन्सार राजस्व कम हुँदा चालू आर्थिक वर्षको पहिलो पाँच महिनामै खैबर पख्तुनख्वाले करिब २.५ अर्ब रुपैयाँ राजस्व गुमाएको जनाइएको छ।

प्रान्तका निर्यातकहरूले दैनिक ४० लाख अमेरिकी डलरभन्दा बढी नोक्सानी व्यहोर्नुपरेको उल्लेख गर्दै अरबौँ रुपैयाँ मूल्यका सामान सीमा क्षेत्रमा अल्झिएको बताएका छन्। औषधि लगायतका सामग्रीको म्याद सकिँदा अपूरणीय क्षति हुने जोखिम पनि बढेको छ।

व्यापारीहरूले सीमा लामो समयसम्म बन्द रहँदा उद्योगहरू बन्द हुने, रोजगारी गुम्ने र आर्थिक अस्थिरता बढ्ने चेतावनी दिएका छन्। खैबर पख्तुनख्वाको औद्योगिक क्षेत्रको करिब ९० प्रतिशत आयात–निर्यात अफगान बजारमा निर्भर रहेको उनीहरूको भनाइ छ।

उनीहरूले अफगानिस्तानले इरान र मध्य एसियाली मुलुकतर्फ व्यापार मोड्दै गए खैबर पख्तुनख्वामा आधारित व्यापारीहरूले स्थायी रूपमा बजार गुमाउन सक्ने चेतावनी पनि दिएका छन्।

हालै सार्वजनिक एक प्रतिवेदन अनुसार पाकिस्तान–अफगानिस्तान द्विपक्षीय व्यापार चालू आर्थिक वर्ष (२०२५–२६) को पहिलो छ महिनामा ५३ प्रतिशतले घटेर ५९ करोड ४० लाख डलरमा सीमित भएको छ, जुन अघिल्लो वर्षको सोही अवधिमा १.२६ अर्ब डलर रहेको थियो।