खबर ठुलो छ
‘फुटको दस्तावेज बन्न सक्छन् ओली–प्रचण्डका दस्तावेज’

वरिष्ठ नेता खनाल भन्छन्, कुनै हालतमा पार्टी फुट्दैन

हिपमत डटकम

सत्तारुढ दल नेपाल कम्युनिस्ट (नेकपा) को आज मङ्गलबार बस्ने सचिवालय बैठकमा अध्यक्ष केपी शर्मा ओली र पुष्पकमल दाहाल ‘प्रचण्ड’ले पेश गरेका प्रतिवेदनमाथि निणार्यक छलफल हुँदैछ ।

दुवै प्रतिवेदनमाथि सचिवालयमा छलफलपछि नेकपाभित्रको विवाद कसरी अघि बढ्छ भन्ने दिशा तय हुने नेताहरुको भनाइ छ ।

कात्तिक २८ गते अध्यक्ष प्रचण्डले पेश गरेको प्रतिवेदनको प्रधानमन्त्री समेत रहेका अध्यक्ष ओलीले मङ्सिर १३ को बैठकमा जबाफी प्रतिवेदन पेश गरेका थिए । ओलीले आफ्नो जबाफी प्रतिवेदनमा प्रचण्डको प्रतिवेदन अस्वीकार मात्रै होइन खारेज नै गर्नुपर्ने बताइसकेका छन् । उनले उक्त प्रतिवेदन खारेज नगेर पार्टी एकता टुट्ने सङ्केत गरेको र प्रस्ताव फिर्ता गर्न प्रचण्ड सहमत नभएको अवस्थामा नेकपाको आगामी यात्रा कसरी अघि बढ्छ भन्ने चासो नेता कार्यकर्ता पङ्क्तिमा बढ्दै गएको छ ।

यद्यपि कतिपय नेताहरुले दुई अध्यक्षका फरक फरक प्रतिवेदनले पार्टी थप बलियो बन्ने दाबी गरेका छन् ।

पत्रयुद्ध गरेर एकअर्कामाथि आरोप लगाइरहेका ओली र प्रचण्ड मङ्सिर १६ को सचिवालय बैठकपछि कसरी अघि बढ्ने भन्ने भित्री रणनीति बनाउन व्यस्त छन् । यदि ओली सहमतिमा नआए प्रचण्ड र वरिष्ठ नेता माधवकुमार नेपाल पक्ष सचिवालय बैठकमा पेस भएका सबै डकुमेन्टहरु स्थायी कमिटीमा लैजाने मनस्थितिमा पुगेको छ । ओली पक्ष भने प्रचण्डको प्रस्ताव फिर्ता वा संशोधन गराएर सचिवालयबाटै साझा प्रस्ताव बनाउदै अघि बढ्नुपर्ने छ ।

‘यदि सहमतिमा नआउने हो भने डकुमेन्टहरु स्थायी कमिटी र केन्द्रीय कमिटीमा अवस्य जान्छन्,’ स्थायी समिति सदस्य मात्रिका यादवको भनाइ छ ।

सचिवालय बैठकको माग गर्दै पाँच नेताले लेखेको पत्रको जबाफमा कात्तिक २५ गते प्रधानमन्त्री ओलीले प्रचण्डलाई जबाफी पत्र लेखेपछि नेकपामा पत्रयुद्ध सुरु भएको थियो ।

कात्तिक २८ मा प्रचण्डले सचिवालय बैठकमा ओलीलाई जबाफसहित १९ पेजको प्रस्ताव पेस गरे । प्रचण्डको प्रस्तावलाई आरोपपत्रको संज्ञा दिएका ओलीले त्यसको जबाफमा मङ्सिर १३ गते बसेको सचिवालयमा ५३ बुँदे काउन्टर जबाफी प्रस्ताव पेस गर्दै प्रचण्डलाई प्रतिप्रश्न समेत गरेका थिए । नेताहरुबीचको अन्तरद्वन्द्वले पार्टी फुटमा जाने हो कि भन्ने नेता कार्यकर्ताको बुझाइ बढ्दै गएका बेला दुवै प्रस्तावमाथि आजको बैठकमा छलफल हुँदैछ । वरिष्ठ नेता झलनाथ खनाल भने यो अन्तरद्वन्द्वले पार्टी नफुट्ने दाबी गर्छन् । अन्तरसङ्घर्षले पार्टी थप एकताबद्ध बनाउन सहयोग पुग्ने खनालको विश्वास छ ।

‘अन्तरसङ्घर्ष बढेको छ, त्यो सत्य हो । तर यसकै कारण पार्टी नै फुट्छ भन्ने हल्ला चलिरहेका छन्, त्यो सत्य होइन’, वरिष्ठ नेता खनाल भन्छन्, ‘यो त आन्तरिक समस्या हल गर्नका लागि छलफल भएको मात्र हो । अन्तरसङ्घर्षले पार्टीलाई अझ मजबुत बनाउँछ ।’ दुई अध्यक्षका प्रतिवेदनको छिनोफानो सचिवालयले गर्छ कि तल्ला कमिटीमा पुग्छ त ? भन्ने प्रश्नमा खनाल मङ्गलबारको बैठक कुर्न सुझाव दिन्छन् । ‘मङ्गलबार बैठक बस्दैछ त्यसपछि के हुन्छ भन्ने टुङ्गो लाग्छ’, प्रचण्ड पक्षमा उभिएका खनालको भनाइ छ ।

नेकपा स्थायी समिति सदस्य सत्यनारायण मण्डल पार्टीभित्र विवाद नरहेको तर सचिवालयका नेतामा मात्रै विवाद रहेको बताउँछन् । ‘यी नेताहरुले देश र जनताका लागि राजनीति गरेको हो भने आत्मालोचनाका अघि बढ्नुपर्छ । पद्धतिको कुरा गर्ने होे भने ५ जना नेताको स्वीकृतिमा पेश गरेको प्रस्ताव कुन सिद्धान्तका आधारमा गरेको हो ? त्यसको जबाफ दिनुपर्छ’, मण्डलको भनाइ छ । उनले केपी ओलीलाई प्रचण्डले भ्रष्टाचारीको नाइके भनेर आरोप लगाएपछि कि त्यसको पुष्टि गर्नुपर्ने कि माफी मागेर अध्यक्ष पदबाट राजीनामा गर्न चुनौती दिए ।

अर्का स्थायी समिति सदस्य हरिबोल गजुरेल सचिवालयबाट निकास आउने सम्भावना कम रहेको देख्छन् । ‘मुख्य कुरा जनस्तरमा भएका आलोचनालाई नेताहरुले रियलाइज गर्नुपर्छ । त्यसो गरेमा समस्या समाधानतर्फ जान्छ । तर मेरो गोरुको बाह्रै टक्का भन्ने हो भने केही हुँदैन र सचिवालयले हल गर्ला भन्ने मलाई लाग्दैन’, गजुरेलको भनाइ छ । ‘नेताहरुले व्यवहारबाट देखाउने हो अनि मात्रै उनीहरुले लेखेको र बोलेको कुरा जनताले पत्याउँछन् । त्यसका लागि उहाँहरुले व्यवहार पनि त्यही किसिमले देखाउनसक्नुपर्छ’, पूर्व मन्त्रीसमेत रहेका गजुरेलको निष्कर्ष छ ।

तर केन्द्रीय सदस्य विष्णु रिजाल दुवै अध्यक्षका प्रतिवेदनमा कमीकमजोरी समेत केलाएकाले समस्या समाधान हुन सक्ने अवस्था अझै पनि रहेको बताउँछन् ।

‘कमीकमजोरीलाई सहज ढङ्गले आलोेचना आत्मालोचनाको पद्धतिबाट जान सक्ने ठाउँ अझै छ । शतप्रतिशत आफूले भनेजस्तो नभए पनि यो यो कमजोरी छ र सँच्च्याऊ भन्दा दुवै पक्षका समस्या देखाइएका पनि छन्’, रिजालको भनाइ छ ।

यद्यपि नेता रिजाल दुवै प्रतिवेदन एकताको आधार पनि बन्नसक्ने अवस्था कायमै रहेको बताउँछन् । ‘त्यसैले उठेका प्रवृत्तिहरुको समाधान गरौँ र एउटै दस्तावेज बनाएर नयाँ एकताका साथ जाऊँ भन्दा एकताको आधार पनि बन्न सक्छ’, उनको भनाइ छ ।

रिजालले त्यो बाटो नहिँडेर नेताहरु नमिल्ने र विभाजनतिरै जाने मनस्थितिमा भए दुवै दस्तावेजहरु फुटका दस्तावजका रूपमा पनि प्रमाणित हुनसक्ने सम्भावना पनि रहेके बताउँछन् । ‘चाहँदा एकताको दस्तावेज बन्ने आधार पनि छन्, नभए फुटका दस्तावेज बन्ने आधार पनि छन् । त्यसैले मूल रूपमा नेतृत्वले निर्णय गर्नुपर्छ कि हामी कता जाने भनेर ।’ रिजालको बुझाइ छ ।

नेता रिजाल नेकपामा दस्तावेज आएर समस्या आएको नभई समस्या आएर दस्तावेज आएको दाबी पनि गर्छन् । समस्या छ भन्ने कुरा पहिले नै थाहा भएको भन्दै उनले दस्तावेजले समस्या नल्याएको दाबी गरे । ‘दस्तावेज समस्या नै होइन, समस्या आएपछि दस्तावेज आएका हुन्’, रिजालको ठोकुवा छ ।

नेताहरुबीच सहमति नभए दुवै दस्तावेज सचिवालय, स्थायी समिति र केन्द्रीय कमिटीमा लैजाने केही नेताहरुको भनाइ छ । यसरी फरक दस्तावेज तल्ला कमिटीमा पुग्दा थप समस्या आउने हो कि भन्ने प्रश्नमा रिजालको बुझाइ फरक छ । ‘तल पुग्दैन । माथि नै यसको टुङ्गो लाग्छ । अलगअलग जाने हुनुभयो भने पनि तल पुगुन्जेल कुर्ने नेताहरुको धैर्य छैन । एकता हुने भयो भने पनि तलको सुझावका आधारमा हुँदैन । किनभने तलका नेता कार्यकर्ताले कसैले पनि फुट्नुपर्छ भनेका छैनन्’, रिजालको विश्लेषण छ ।

रिजालले विवादमा ओली र प्रचण्ड मात्रै मिलेर पनि समस्या समाधान नहुने बताए । भदौ २६ लाई ‘कट अफ डेट’ बनाए पनि समस्या बल्झिएको उदाहरण दिँदै उनले त्यो टिक्न नसक्नु सिद्धान्त र पद्धतिमा आधारित नभएर भएको बताए । ‘दुई जनाको लेनदेनजस्तो मात्रै भएकाले समस्या पुनः बल्झिएको हो । त्यसैले फेरि लेनदेनको विषय बनाइयो भने एक दुई महिना टरे पनि बल्झिने भएकाले कमिटीबाटै निकास खोज्नुपर्ने हुन्छ’, उनको जोड छ ।

रातोपाटीबाट

मंगलबार, मंसिर १६, २०७७मा प्रकाशित गरिएको
प्रतिक्रिया दिनुहोस
सम्पर्क

हिपमत मिडिया हाउस प्रा.लि.
बिराटनगर-७ मोरड प्रदेश नम्बर -१
सूचना विभाग दर्ता नं.
१५१५/०७६/०७७

हाम्रो बारे

हिपमत मिडिया हाउस प्रा.लि. द्वारा संचालित  अनलाईन पत्रिकाले नेपालीको साझा आवाजको रुपमा आफ्नो सामाचार सम्प्रेषण गर्ने छ ।

टेलिफोन

कार्यालय – ०२१-५१७६७८
विज्ञापन – ९८०७३७०१०६
ई–मेल
[email protected]

सोसल मिडिया