जिल्ला कारागार मोरङका २० वर्षीय बन्दी युवकको शुक्रवार विहान १० बजे कोशी अस्पातलमा उपचारको क्रममा मृत्यु भएको छ ।
कारागारमा युवकलाई स्वास्थ्यमा समस्या देखेपछी बिहीबार बिहान अस्पताल भर्ना गराएको थियो । सोही दिन बेलुकी ९ बजे कोरोना पोजेटिभ पुष्टि भएको कोशी अस्पताल विराटनगरका आइसोलेसन प्रमुख डा. लक्ष्मीनारायण यादवले बताएका छन् ।  चिकित्सकका अनुसार कोशी अस्पताल कोभिड–१९ उपचार केन्द्र विराटनगरमा आईसीयू बेड खाली नभएका कारण अस्पतालकै आइसोलेसनमा राखेर युवकको उपचार भइ रहेको क्रममा मृत्यु भएको छ ।  जिल्ला कारागार मोरङका जेलर सुवास लामिछानेका अनुसार मृतक युवक लागूऔषध मुद्दामा पुर्पक्षका लागि थुनामा थिए । २१ माघ २०७६ देखि उनी जिल्ला कारागारमा रहेका थिए ।  १५ असोजमा कारागारमै रहेका २७ वर्षीय पुरुषको समेत मृत्यु भएको थियो । ९१८ जना कैदी बन्दी रहेको कारागारमा पाँच जनालाई कोरोना पोजेटिभ देखिएको छ ।