भारतले नेपाली भूमि लिपुलेक हुँदै चीनको तिब्बतमा रहेको धार्मिकस्थल मानसरोवर जाने सडक मार्ग खोलेपछि नेपाल सरकारलाई नेपालको पूर्ण नक्सा जारी गर्न दबाब पर्‍यो । केही हप्ताअघि सरकारले लिपुलेक, कालापानी र लिम्पियाधुरा समाविष्ट नयाँ नक्सा जारी गरे पनि भारतले स्वीकार गरेको अवस्था छैन । नेपालको भूमि अतिक्रमण नगरेको भारतको दाबी छ ।

लिपुलेकसहित भारतले अतिक्रमण गरेको भूमि फिर्ता ल्याउनु पर्ने माग उठिरहेको बेला संघीय सदभावना पार्टीकी उपाध्यक्ष सरिता गिरी भने भारतको पक्षमा वकालत गरिरहेकी छन् । उनले विभिन्न सञ्चारमाध्यममा लिपुलेक, कालापानी र लिम्पियाधुरा नेपालको हो भन्ने प्रमाण नभएको बताएकी छन् । अहिले उनको यो अभिव्यक्तिले सामाजिक सञ्जालमा व्यापक विरोध भैरहेको छ ।

अभिनेत्री नीता ढुंगानाले पनि गिरीलाई नेपालको लायक नभएको भन्दै भारतमै गएर राजनीति गर्न सुझाएकी छन् । उनले आफ्नो आधिकारिक फेसबुकमा लेखेकी छन्, ‘हो नारीलाई आफ्नै माइती नै प्यारो हुन्छ । उतै गएर राजनीति गर्दा कसो होला ! तिमी नेपालको लायक छैनौ ।’ नीताले नेतृ गिरीप्रति लक्षित गरेर लेखेको स्टाटसमा उनका प्रशंसकहरुले पनि समर्थन जनाएका छन् ।