लकडाउनका कारण खाद्यान्न संकटमा परेका अति विपन्न तथा गरिव घरपरिवारलाई मोरङका स्थानीय तहहरुले पहिलो चरणको राहत वितरण गरेका छन् ।मोरङमा १७ स्थानीय तहले ८५ हजार एक सय सात २ घरधुरीलाई राहत वितरण गरेको छ ।जिल्ला प्रहरी कार्यालय मोरङले सार्वजनिक गरेको तथ्याङ्कअनुसार जिल्लाको १७ स्थानीय तहले अति विपन्न तथा गरिव घरपरिवारलाई खाद्यान्न वितरण गरेका छन् ।

सबै स्थानीय तहले गरी २९ लाख ७३ हजार ४ सय दुई किलो चामल, १ लाख ७६ हजार ६ सय ३४ किलो दाल वितरण गरेको मोरङ प्रहरीले जनाएको छ । त्यस्तै ५८ हजार ३ सय ३८ किलो आलु, ८५ हजार दुई सय ३७ किलो नुन, ४९ हजार ७ सय ८५ लिटर खाने तेल वितरण गरिएको छ ।

स्थानीय तहले परिवार संख्या हेरी २५ केजी र साढे १२ केजीका दरले चामल वितरण गरेका छन् । प्रदेश सरकारले राहत वितरणका लागि १ सय ३७ स्थानीय तहलाई साढै ९ करोड रुपैया निकासा गरेको थियो ।

प्रदेश सरकारले राहत वितरणका लागि महानगरपालिकालाई २० लाख, उपमहानगरपालिकाहरुलाई १५ लाख, नगरपालिकाहरुलाई १० लाख र गाउँपालिकालाई ५ लाख रुपैयाँका दरले बजेट विनियोजना गरेको थियो ।