हिपमत डटकम
विराटनगर ,मंसिर २७ गते ।
विराटनगर महानगरपालिका–४ चाँदनीचौकमा श्रीमानले चक्कु प्रहार गर्दा आज विहान एक महिला गम्भीर घाइते भएकी छन् ।
श्रीमान ५० वर्षीय डम्बर कार्कीले श्रीमती ३५ वर्षीय सुस्मिता कार्कीमाथि तरकारी काट्ने चक्कु प्रहार गरेको प्रहरीले जनाएको छ । चक्कु प्रहारबाट सुस्मिताको टाउको, घाँटी र हातमा गहिरो चोट लागेको छ । गम्भीर अवस्थाकी सुस्मितालाई लाइफगार्ड अस्पतालमा उपचार हुन नसकेपछि थप उपचारका लागि नोवेल शिक्षण अस्पताल लगिएको छ ।
उपचारमा संलग्न चिकित्सकले अवस्था गम्भीर रहेको जानकारी दिएको मोरङ प्रहरीका प्रवक्ता डीएसपी राजकुमार खिँउजूले बताए । झापा घर भएका कार्की दम्पत्ति विराटनगर–११ वसपार्कमा डेरा बस्दै आएका थिए । दुवै जना बुधबार चाँदनी चौकस्थित सुस्मिताकी दिदी रीता कटुवालको घरमा पाहुना गएका थिए ।
पाहुना गएकै घरमा श्रीमान–श्रीमतीबीच सामान्य विवाद भएपछि डम्बरले चक्कु प्रहार गरेर श्रीमतीलाई मरणासन्न अवस्थामा पु¥याएको प्रहरीले जनाएको छ । डीएसपी खिँउजूले डम्बरलाई पक्राउ गरेर घटनाका बारेमा अनुसन्धान सुरु गरिएको जानकारी दिए ।