काठमाडौँ । प्रधानमन्त्री सुशीला कार्कीले पर्वहरूले आपसी एकता, शान्ति र सद्भाव बढाउन प्रेरणा प्रदान गरून् भन्ने कामना व्यक्त गरेकी छिन्।

तमु समुदायको तमु ल्होसार तथा दुरा समुदायको म्हैप्रु नकुमा पर्वका अवसरमा आज शुभकामना सन्देश जारी गर्दै प्रधानमन्त्री कार्कीले सबै नेपालीको जीवनमा सुख, शान्ति र समुन्नति प्राप्त होस् भन्ने शुभेच्छा व्यक्त गरेकी हुन्।

उनले स्वदेश तथा विदेशमा रहेका सम्पूर्ण नेपालीहरूलाई यी पर्वहरूको अवसरमा हार्दिक शुभकामना दिएकी छिन्।

प्रधानमन्त्री कार्कीले सामाजिक सञ्जाल फेसबुकमार्फत सन्देश जारी गर्दै लेखेकी छिन्, “यी पर्वहरूले हाम्रो बहुसांस्कृतिक पहिचानलाई थप सुदृढ गर्दै आपसी एकता, शान्ति र सद्भाव बढाउन प्रेरणा प्रदान गरून्। सबै नेपालीको जीवनमा सुख र समुन्नति होस्।”