हिपमत डटकम
नयाँ दिल्ली । दिल्लीको इन्डिया गेट क्षेत्रमा आइतबार विद्यार्थीहरूले बढ्दो वायु प्रदूषणविरुद्ध गरेको विरोध प्रदर्शन हिंसात्मक बनेको छ। संसद क्षेत्रबाट केही टाढा सुरू गरिएको उक्त प्रदर्शनमा सहभागीहरूले दिल्ली–एनसीआरको खराब हावापानीका विरुद्ध सडक अवरुद्ध गर्ने प्रयास गरेका थिए, जसपछि प्रहरीले उनीहरूलाई जबरजस्ती हटाइयो।
प्रदर्शनको क्रममा प्रहरी र प्रदर्शनकारीबीच झडप भएको पुष्टि भएको छ। प्रहरीले प्रदर्शनकारीहरूले आफूमाथि पेपर स्प्रे प्रयोग गरेको दाबी गरेको छ। पेपर स्प्रेका कारण केही प्रहरी अधिकारी घाइते भई अस्पताल भर्ना गरिएको दिल्ली प्रहरीको भनाइ छ।
प्रदर्शनस्थलबाट प्राप्त दृश्यमा केही विद्यार्थीहरूले माओवादी कमाण्डर माडवी हिडमाको तस्वीर बोकेका देखिएका थिए। हालै प्रहरी मुठभेडमा हिडमाको मृत्यु भएको सुरक्षा निकायहरूले जनाएका छन्, भने यी तस्वीरबारे भारतीय जनता पार्टी (भाजपा)ले प्रश्न उठाएको छ।
पीटीआई र एएनआईका अनुसार प्रदर्शनकारीहरू पोस्टर, प्लेकार्ड र नाराबाजीसहित इन्डिया गेट क्षेत्रमा भेला भएका थिए। प्रहरीको बाक्लो उपस्थिति बीच उनीहरूले त्यहाँ धर्ना बसेका थिए।
विद्यार्थीहरूले सरकारलाई वायु प्रदूषण नियन्त्रणमा ठोस कदम चाल्न आग्रह गर्दै “हामी सफा हावा चाहन्छौँ”, “तथ्यांक नलग” लगायतका प्लेकार्ड बोकेका थिए। प्रदर्शनमा धेरै महिला विद्यार्थी पनि सहभागी थिए, जसलाई हटाउन महिला प्रहरी परिचालन गरिएको थियो।
एएनआईसँग कुरा गर्दै एक छात्राले भनिन्, “हामी नर्क जस्तै वातावरणमा बाँचिरहेका छौँ। सरकारले प्रदूषणलाई खतरा भनेर स्वीकार गर्नै मान्दैन।”
धेरै प्रदर्शनकारीहरूले सरकारी एयर क्वालिटी इनडेक्स (AQI) तथ्यांकमाथि पनि शंका व्यक्त गर्दै “तथ्यांक लुकाइन्छ” भन्ने आरोप लगाए।
आइतबार दिल्लीको AQI ५०० नजिक पुगेको थियो, जुन अत्यन्तै अस्वस्थ श्रेणीमा पर्छ। प्रदूषण नियन्त्रणका लागि शहरमा ग्रेडेड रेस्पोन्स एक्सन प्लान (GRAP)–३ लागू गरिएको छ, जसअनुसार निर्माण तथा ध्वस्तीकरण गतिविधि रोकिएको छ। तर राष्ट्रिय सुरक्षा तथा पूर्वाधारसम्बन्धी परियोजनालाई भने छुट दिइएको छ।
नयाँ दिल्लीका डीसीपी देवेश कुमार महलाका अनुसार, “केही प्रदर्शनकारीहरूले सी–हेक्सागन क्षेत्रको ब्यारिकेड तोडेर सडकमा धर्ने बसे। हाम्रो अधिकारीमाथि पेपर स्प्रे गरिएको छ र उनीहरूको अस्पतालमा उपचार भइरहेको छ।”
उनका अनुसार एम्बुलेन्स तथा मेडिकल कर्मचारीलाई बाटो नपाउँदा अतिरिक्त सुरक्षा कदम चाल्नुपरेको थियो।
सोमबार पनि दिल्लीलाई बाक्लो धुवाँले घेरेको थियो। केन्द्रीय प्रदूषण नियन्त्रण बोर्ड (CPCB)का अनुसार केही स्थानमा AQI ४४० नाघेको छ। आनन्द विहार क्षेत्रमा सोमबार बिहान AQI ४४१ मापन गरिएको थियो, जुन गम्भीर श्रेणीमा पर्छ।
१.
२.
३.
