काठमाडौँ, असोज ३० – नेकपा (माओवादी केन्द्र) का वरिष्ठ नेता गणेश साहले पार्टी परित्याग गरेका छन्। उनी केन्द्रीय कमिटी विघटन हुनुअघिका पार्टी सचिवसमेत थिए।

साहले रातोपाटीसँग कुराकानी गर्दै आफूले माओवादी केन्द्रको सदस्यता र नेतृत्व दुवैबाट अलग भएको पुष्टि गरेका हुन्।
उनले भने, “अब म माओवादीको नेता पनि रहिनँ, सदस्य पनि रहिनँ।”

पार्टीले देशभर एकताको स्पष्ट सन्देश दिन नसकेको र संगठनभित्रको दिशाहीनताले आफूलाई निराश बनाएको उनले बताएका छन्।
साहको भनाइमा, पार्टीले आमजनता र कार्यकर्ताबीच विश्वास निर्माण गर्ने हैसियत गुमाइसकेको छ, जसका कारण आफूलाई माओवादीमा बसिरहन उपयुक्त नलागेको हो।

यसअघि पनि गणेश साह पार्टीभित्रको नीति, नेतृत्वशैली र एकतासम्बन्धी प्रश्न उठाउँदै आएका थिए। उनका विचारमा, दिगो विचार र स्पष्ट कार्यदिशा नभएसम्म वाम एकता सम्भव छैन।

पार्टीभित्र नेतृत्व र नीतिगत बहस तीव्र भइरहेका बेला साहको निर्णयलाई गम्भीर संकेतको रूपमा हेरिएको छ।