विराटनगर । संखुवासभा जिल्लाले ४८ औं प्रमुख जिल्ला अधिकारीको रूपमा सिर्जना थपलियालाई पाएको छ । उनी सङ्खुवासभा जिल्लाको इतिहासमै पहिलो महिला प्रमुख जिल्ला अधिकारी हुन ।

सहसचिव सिर्जना थपलियाले सोमबार पदभार ग्रहण गर्दै प्रजिअका रूपमा जिल्लाको जिम्मेवारी सम्हालेकी हुन् । यसअघि प्रधानमन्त्री तथा मन्त्रिपरिषद् कार्यालय सिंहदरबारमा कार्यरत थपलियाले पदभार ग्रहण गर्दै आफूले निजामती सेवामा आर्जन गरेको अनुभवलाई जिल्लाको विकास, सुशासन र सार्वजनिक सेवामा लागू गर्ने प्रतिबद्धता जनाइन्।

पदभार ग्रहणपछि उनले भनिन्, “निर्दिष्ट ऐन, कानुनको परिधिभित्र रही जिल्लाका सबै राजनीतिक दलका नेता, बुद्धिजीवी तथा नागरिक समाज लगायतसँग सहकार्य गर्दै तोकिएका जिम्मेवारी पूरा गर्नेछु।”

थपलियाको आगमनसँगै सङ्खुवासभामा महिला नेतृत्वको नयाँ आयाम खुलेको भन्दै स्थानीयहरूले स्वागत गरेका छन्।