हिपमत डटकम
काठमाडौं — नेपाली कांग्रेसका केन्द्रीय सदस्य तथा शिक्षा विभाग प्रमुख नैनसिंह महरले संविधानले ग्यारेन्टी गरेको निःशुल्क शिक्षाको प्रावधान विद्यालय शिक्षा विधेयकमा स्पष्ट रूपमा समावेश हुनुपर्ने बताएका छन्।
शुक्रवार बानेश्वरमा स्कुल फाउन्डेसनद्वारा आयोजित ‘शिक्षा सरोकार तथा विमर्श’ कार्यक्रममा बोल्दै उनले विद्यालय शिक्षा विधेयक देशको शैक्षिक भविष्यसँग प्रत्यक्ष रूपमा जोडिएको गम्भीर विषय भएको बताए।
उनले कांग्रेसको तर्फबाट संसदीय समितिमा केही महिनाअघि नै विधेयकका लागि सुझाव बुझाइसकेको जानकारी दिए। सरोकारवालासँगको छलफलका आधारमा विधेयक परिमार्जनका लागि कांग्रेसले पहल गरिरहेको उनले प्रस्ट पारे।
महरले शिक्षाको गुणस्तरीयता, विद्यार्थीको भविष्य, र सामाजिक समानताका पक्षमा बलियो पैरवी गर्दै कर्तव्यबोधसहितको सुधार आवश्यक रहेको बताए। उनले भने, “अधिकारको मात्र कुरा गर्दा प्रणालीमा सन्तुलन बिग्रिन्छ, त्यसैले कर्तव्यप्रति पनि समान संवेदनशीलता आवश्यक छ।”
उनले शिक्षा क्षेत्रमा कूल बजेटको २० प्रतिशत छुट्याउनुपर्ने, शिक्षकलाई निजामतीसरह सेवा–सुविधा दिनुपर्ने, प्रधानाध्यापकका लागि अलग व्यवस्था गर्नुपर्ने, र भौतिक पूर्वाधार तथा तालिममा राज्य गम्भीर हुनुपर्ने आवश्यकता दोहोर्याए।
साथै, कमजोर वर्गका जेहेन्दार विद्यार्थीका लागि छात्रवृत्तिसँगै आवास व्यवस्थाको मागलाई पनि कांग्रेसले गम्भीरतापूर्वक लिएको बताएका छन्। पहुँच र समानता सुनिश्चित गर्न यस्ता प्रावधानहरू विधेयकमा स्पष्ट रूपमा उल्लेख गर्नुपर्ने उनको भनाइ थियो।
१.
२.
३.
