काठमाडौं  – नेपाली सेनाका प्रधानसेनापति प्रभुराम शर्मा भदौ २४ गतेदेखि अनिवार्य अवकाशमा जाने भएका छन्। उनले ४२ वर्षको लामो सैनिक सेवा र तीन वर्षको प्रधानसेनापतिको कार्यकाल पूरा गरेका छन्।

उनको सम्मानमा बुधबार जङ्गी अड्डामा विशेष समारोह आयोजना गरिएको छ। रक्षा सचिव रामेश्वर दंगालले शर्माको योगदानलाई चिरकालसम्म सम्झन योग्य बताउँदै प्रधानसेनापति शर्माको बौद्धिक र नेतृत्व गुणहरूलाई सराहेका छन्। नयाँ प्रधानसेनापति अशोकराज सिग्देललाई बधाई दिँदै आगामी दिनमा सहयोग गर्ने आश्वासन दिएका छन्।

कामु प्रधानसेनापति सिग्देलले शर्माको सन्तुलित जीवन र जटिल परिस्थितिहरूको वस्तुपरक ढंगबाट सामना गर्ने क्षमताको प्रशंसा गरेका छन्।

समारोहमा प्रधानसेनापति शर्माले नेपाली सेनालाई सम्झनास्वरूप उपहार प्रदान गरेका थिए, र सशस्त्र प्रहरी, नेपाल प्रहरी, र राष्ट्रिय अनुसन्धान विभागका प्रमुखहरूले पनि उपहार दिएका थिए।

यस अवसरमा पूर्वप्रधानसेनापतिहरू, पूर्वरक्षा सचिवहरू, नेपाली सेनाका रथीवृन्द, सशस्त्र प्रहरी र नेपाल प्रहरीका प्रमुख, रक्षा मन्त्रालयका अधिकारीहरू, सैनिक श्रीमती संघका सदस्यहरू, र अन्य विशिष्ट व्यक्तिहरूको उपस्थिति रहेको थियो।