काठमाडौं, प्रधानमन्त्री केपी शर्मा ओलीका प्रेस सल्लाहकार तथा नेकपा (एमाले) का केन्द्रीय सदस्य सूर्य थापा सामाजिक सञ्जाल मार्फत प्रधानमन्त्री ओलीलाई चार पटकसम्म पार्टी सदस्यताबाट निस्कासित गरेको घोषणा गर्नेहरुलाई अपराधीको संज्ञा दिएका छन् ।

सर्वोेच्च अदालतको फैसला अनुसार नेकपा एमाले र नेकपा माओवादी केन्द्र अलग भएपछि माधव कुमार नेपाल र झलनाथ खनाल सहितका नेता कार्यकर्ताहरु नेकपा एमालेमा फर्किएका छन् ।

“प्रधानमन्त्री तथा पार्टी अध्यक्ष केपी शर्मा ओलीलाई चार पटक पार्टी सदस्यताबाट निस्कासित गरेको घोषणा गर्ने अपराधीहरूको मुहार झलझली सम्झना भइरहेको छ । जनताले दुई तिहाइको जनादेश दिएकोमा सरकारलाई घेराबन्दी गरी असफल बनाउन न्वारानदेखिको बल लगाउने यिनको अनैतिक हर्कत बिर्सन मिल्दैन ।” थापा सामाजिक सञ्जाल फेशबुकमा लेखेका छन् ।