काठमाडौं — अस्ट्रेलियन ओपनअन्तर्गत हुने जुनियर इलिट ट्रफी प्रतियोगितामा सहभागिता जनाउन टेनिस खेलाडी शिभाली गुरुङ अस्ट्रेलिया प्रस्थान गर्ने भएकी छन्। अष्ट्रेलियाको मेलबर्नमा जनवरी १४ देखि ३० तारिखसम्म सञ्चालन हुने उक्त प्रतियोगिताको १४ वर्षमुनिको विधामा उनी प्रतिस्पर्धा गर्नेछिन्।

शिभालीलाई शुक्रबार काठमाडौंमा आयोजित एक कार्यक्रमबीच भाटभटेनी सुपर मार्केट र इन्फिनिटी वेयरले औपचारिक रूपमा बिदाइ गरेका हुन्। उमेर समूहका विभिन्न अन्तर्राष्ट्रिय प्रतियोगितामा उत्कृष्ट प्रदर्शन गर्दै उनले ग्रान्डस्लामस्तरको प्रतियोगितासम्म पुग्ने नेपालको पहिलो महिला टेनिस खेलाडी बन्ने उपलब्धि हासिल गरेकी छन्।

बिदाइ कार्यक्रममा शिभाली गुरुङले सबैको साथ, सहयोग र विश्वासका कारण इलिट ट्रफी खेल्ने अवसर प्राप्त भएको बताइन्। उनले अस्ट्रेलियन ओपनमा नेपालको प्रतिनिधित्व गर्दै उत्कृष्ट खेल प्रदर्शन गर्ने प्रतिबद्धता व्यक्त गरिन्।

हाल शिभाली १४ वर्षमुनिको टेनिस एसियाली वरियतामा तेस्रो स्थानमा रहेकी छन्, जसले अन्तर्राष्ट्रिय टेनिस क्षेत्रमा उनको सम्भावना र क्षमता प्रस्ट पारेको छ।