चीनले दक्षिणी टापु प्रान्त हैनानस्थित वेन्चाङ अन्तरिक्ष प्रक्षेपण केन्द्रबाट बुधबार दुई नयाँ प्रायोगिक उपग्रह सफलतापूर्वक कक्षामा पठाएको छ।

‘शिजियान–२९ए’ र ‘शिजियान–२९बी’ नाम दिइएका यी उपग्रहहरू बिहान ६:४० बजे (बेइजिङ समय) लङ मार्च–७ए वाहक रकेटमार्फत प्रक्षेपण गरिएका हुन्। प्रक्षेपणपछि दुवै उपग्रह निर्धारित कक्षामा सफलतापूर्वक प्रवेश गरेको चिनियाँ अन्तरिक्ष निकायले जनाएको छ।

यी उपग्रहहरू मुख्यतः अन्तरिक्ष लक्ष्य पहिचान तथा अनुगमनसँग सम्बन्धित नवीन प्रविधिको परीक्षण र प्रमाणीकरणका लागि प्रयोग गरिनेछ। परीक्षणका क्रममा संकलित प्राविधिक डेटा भविष्यमा उन्नत अन्तरिक्ष प्रणाली विकास, कक्ष व्यवस्थापन, अन्तरिक्ष सुरक्षा तथा निगरानी क्षमतामा सुधारका लागि उपयोगी हुने अपेक्षा गरिएको छ।

वेन्चाङ अन्तरिक्ष प्रक्षेपण केन्द्रबाट लङ मार्च–७ए रकेटमार्फत गरिएको यो प्रक्षेपणसँगै लङ मार्च शृङ्खलाका वाहक रकेटहरूको कुल उडान संख्या ६२३ पुगेको छ। चीनले अन्तरिक्ष प्रविधिमा आत्मनिर्भरता र क्षमताको विस्तार गर्ने लक्ष्यसहित यस्ता प्रायोगिक उपग्रहहरूको प्रयोगलाई निरन्तरता दिँदै आएको छ।