काठमाडौँ – मुग्लिन–नारायणगढ सडकखण्डको तुइनखोला पुलनजिकै गएको पहिरो हटाउन अझै केही समय लाग्ने भएको छ।

बुधबार साँझको भीषण वर्षाका कारण रातभर पहिरो पन्छाउन समस्या उत्पन्न भएपछि सडक पूर्णरूपमा अवरुद्ध भएको सडक डिभिजन कार्यालय भरतपुरले जनाएको छ।

कार्यालयका अनुसार, “आज बिहान ५:३० बजेदेखि नारायणगढ र मुग्लिन दुवैतर्फबाट पाँचवटा उपकरण परिचालन गरिएको छ। तर, ठाउँ साँघुरो भएकाले धेरै उपकरण एकै पटक सञ्चालन गर्न नसकिएकाले पहिरो हटाउन समय लागिरहेको छ।”

सडक सञ्चालन नहुञ्जेलसम्म वैकल्पिक मार्ग प्रयोग गर्न कार्यालयले आग्रह गरेको छ। दसैँको बेला घर फर्किने यात्रुहरू यो अबरोधका कारण गन्तव्यमा पुग्न नसकी मारमा परेका छन्।

त्यसैगरी, धादिङको बेनिघाट गाउँपालिका–१० स्थित जवाङखोला र घोप्टेभीरमा गएको पहिरो भने हटाइएको छ। बिहान ३ बजे पहिरो पन्छाएसँगै नागढुङ्गा–मुग्लिन सडक पुनः सञ्चालनमा आएको नागढुङ्गा–मुग्लिन सडक योजनाले जानकारी दिएको छ।