जनकपुरधाम । नेपाल शिक्षक महासङ्घले विद्यालय शिक्षा विधेयक विगतका सहमतिअनुसार संशोधन नगरे कडा आन्दोलन गर्ने चेतावनी दिएको छ।

शुक्रबार जनकपुरधाममा आयोजित कार्यक्रममा महासङ्घका स्थानीय आन्दोलन परिचालन समितिका संयोजक गौरीशंकर लाल कर्णले उपमहानगरपालिकाका प्रमुख प्रशासकीय अधिकृतलाई ध्यानाकर्षण पत्र बुझाउँदै सरकारले सहमति कार्यान्वयन नगरेको आरोप लगाए।

महासङ्घले विगतमा २०७५, २०७८ र २०८० सालमा क्रमशः ३०, ५१ र ६ बुँदे सहमति गरेको र २०८२ वैशाख १७ गते मन्त्रिपरिषद्ले गरेको ९ बुँदे निर्णय पनि कार्यान्वयन नभएको जनाएको छ।

प्रतिनिधिसभामा प्रस्तुत विद्यालय शिक्षा विधेयक शिक्षक–कर्मचारीमैत्री नभएको भन्दै महासङ्घले अस्थायी शिक्षकको स्थायीत्व, बढुवा, सरुवा प्रणाली, सेवा सुविधा, शिक्षण काउन्सिल, राष्ट्रिय परीक्षा बोर्डमा प्रतिनिधित्व लगायतका माग सम्बोधन गर्न सरकारसँग आग्रह गरेको छ।