हिपमत डटकम
काठमाडौँ, भदौ १२ – केन्द्रीय अनुसन्धान ब्युरो (सीआईबी)का प्रमुख एआईजी चन्द्रकुवेर खापुङ नेपाल प्रहरीको ३२औँ महानिरीक्षक (आईजीपी) नियुक्त भएका छन्। शुक्रबार बसेको मन्त्रिपरिषद् बैठकले आगामी भदौ १९ गतेदेखि लागू हुने गरी उनलाई प्रहरी प्रमुखमा नियुक्त गर्ने निर्णय गरेको हो।
हालका आईजीपी दीपक थापा भदौ १८ मा सेवा अवधि पूरा गरी अनिवार्य अवकाशमा जाँदैछन्। त्यसपश्चात् खापुङले नेपाल प्रहरीको नेतृत्व सम्हाल्नेछन्।
तर, खापुङको कार्यकाल छोटो हुने देखिएको छ। हालको प्रहरी ऐनअनुसार, प्रस्तावित नयाँ प्रहरी विधेयक संसदबाट पारित नभए उनी केवल २ महिना ७ दिन मात्र आईजीपी रहनेछन्। ३० वर्षे सेवा अवधि पूरा गर्दै उनी कात्तिक २६ मा अनिवार्य अवकाशमा जानेछन्।
२०५२ साल कात्तिक २७ गते प्रहरी निरीक्षकबाट सेवा सुरु गरेका खापुङ २०२७ मंसिर २३ मा तेह्रथुमको मेन्छ्यायोम गाउँपालिका–६ मा जन्मिएका हुन्। उनले जेन्डर स्टडिजमा स्नातकोत्तर र कानुनमा स्नातक गरेका छन्।
उनको प्रहरी सेवा कालक्रममा उनले मोरङ, चापागाउँ, धरान, दरबारमार्ग, बागलुङ, काभ्रे, उपत्यका अपराध अनुसन्धान कार्यालय र प्रहरी प्रधान कार्यालयमा विभिन्न तहमा कमान्ड गरेका छन्।
एसपी, एसएसपी, डीआईजी हुँदै २०८१ मंसिर २७ मा एआईजी बनेका खापुङ त्यसयता सीआईबीको नेतृत्व गरिरहेका थिए। उनले इटाली, भियतनाम, चीनलगायत १४ अन्तर्राष्ट्रिय तालिम लिएका छन्।
खापुङलाई “प्रबल जनसेवाश्री” पदकसहित १७ वटा पुरस्कारले सम्मानित गरिएको छ। उनले संयुक्त राष्ट्रसंघको शान्ति मिसन अन्तर्गत दुईपटक हाइटीमा सेवा गरेका छन्।
प्रहरी सेवा बाहेक, उनी गीतकारको रूपमा पनि चिनिन्छन्। हालै सार्वजनिक भएको ‘चाहिन्न मलाई नदेउ सहारा’ बोलको गीतमा उनले आत्मसन्तुष्टि अभिव्यक्त गरेका छन्।
१.
२.
३.
