सुनसरीको दुहबी ७ स्थित भलुवामा जारी आठौं भलुवा गोल्डकप फुटबल प्रतियोगिताको आइतबार भएको दोस्रो प्रि-क्वाटर फाइनल खेलमा पथरी स्पोर्टिङ क्लब मोरङले संयुक्त युवा क्लब दुहबीलाई ४-१ गोल अन्तरले पछि पार्दै क्वाटर फाइनलमा प्रवेश गरेको छ।
खेलको ९ औं मिनेटमा पथरी स्पोर्टिङ क्लब जर्सी नम्बर ७ का खेलाडी बिजय भुजेलले १ गोल गर्दै आफ्नो टिमलाई अग्रता दिलाएका थिए। अत्यन्तै प्रतिस्पर्धात्मक भएको खेलको ३५ औं मिनेटमा संयुक्त युवा क्लब दुहबी जर्सी नम्बर ६ का खेलाडी बिबेस गुरुङले १ गोल गर्दै खेल बराबरीमा पुर्याएका थिए । खेलको ५५ औं मिनेट ७५ औं मिनेट र ७९ औं मिनेटमा पथरी स्पोर्टिङ क्लब मोरङ जर्सी नम्बर ७ का खेलाडी बिजय भुजेलले थप ३ गोल गर्दै आफ्नो टिमको बिजय सुनिश्चित गराए। खेलमा उत्कृष्ट खेलाडी पथरी स्पोर्टिङ क्लब जर्सी नम्बर ७ का खेलाडी बिजय भुजेल घोषित भए।
उनलाई खेलका प्रमुख अतिथी दुहबी नगरपालिका वडा नम्बर ९ का वडाअध्यक्ष मेंहदि हुसैनले नगद ५ हजार तथा ट्रफि प्रदान गरे। भोलीको पहिलो क्वाटर फाइनल खेल एवाइसी गढी सुनसरी र आयोजक श्री गोल्डेन स्टार युथ क्लब भलुवा सुनसरीका बिच हुने आयोजकले जनाएको छ। बिजेता टिमले उपाधी सहित नगद ३ लाख शिल्ड मेडल प्राप्त गर्नेछन् भने उपबिजेता टिमले नगद डेढ लाख शिल्ड मेडल प्राप्त गर्ने तथा विभिन्न विद्या तर्फबाट खेलाडीहरुलाई समेत पुरस्कृत गर्ने जनाइएको छ।