जनकपुरधाम । लोकतान्त्रिक समाजवादी पार्टी (लोसपा)का नेता तथा प्रतिनिधी सभा सदस्य उमाकशंकर अरगरियाले पार्टी अध्यक्ष उपेन्द्र यादव माथी मत बेचेको आरोप लगाएका छन् । उनले उपेन्द्र यादवले मधेशको मत बेचेको आरोप लगाएका हुन् ।

धनुषाको औरही गाउँपालिकामा आयोजित एक कार्यक्रमलाई सम्बोधन गर्दै अरगरियाले मधेशको समानुपातिक मतलाई काठमाडौंमा बेचेको बताए । उनले मधेशका जनताले आफ्ना प्रत्यक्ष उम्मेदबारलाई मत दिएर जिताए पनि समानुपातिक मत उपेन्द्रले बेचेको उनले बताए ।

अरगरियाले भने ‘भोट धनुषाको तर सांसद कसलाई बनायो ? राजेन्द्र श्रेष्ठ, रेणुका गुरुङ्ग, लिला सिटौलालाई यो मधेशको मत बेचिएको हो कि होइन् ?’ काठमाडौंबाट पार्टीलाई २ सय ४० मत मात्र प्राप्त भएको थियो ।

अरगरियाका अनुसार सरुवा बढुवाको नाममा रकम असुली गर्न आफ्नै छोरालाई स्वकीय सचिव राखेका थिए । उनले उपेन्द्रजी १८ महीना सरकारमा रहँदा मधेशी जनतासँग पनि रकम लिएर सरुवा बढुवा गरेको आरोप लगाए ।