हिपमत डटकम
विराटनगर । शरीरलाई ऊर्जा प्रदान गर्नका लागि खाना खाने गरिन्छ । तर, हालको समयमा मानिसले खाइरहेको खानाले ऊर्जा प्रदान गर्नुभन्दा पनि शरीरलाई थकित महसुस गराइरहेको छ । जसकारण कलेजोसँग समबन्धित रोगहरू पनि उत्पन्न हुन थाल्छन् । रक्सी वा मदिराको सेवनबाहेक पनि धेरै खानाले तौल बढाउनुका साथै कलेजोलाई पनि असर गर्न सक्छ ।
रोग नियन्त्रण र रोकथाम केन्द्रको तथ्याङ्कले ४५ लाखभन्दा बढी मानिस कलेजो रोगको सिकार भइसकेका छन् । जसमध्ये २० प्रतिशतभन्दा धेरै मदिराको सेवनबाहेकको कलेजो रोगबाट ग्रस्त छन् । रक्सी मात्र एक्लो पेय पदार्थ होइन जसले शरीरलाई हानि पु¥याउन सक्छ । अत्यधिक फ्रुक्टोज भएको खाना वा पेयले कलेजोका लागि समस्या निम्त्याउँछ ।
अत्यधिक फ्रुक्टोज भएको खाद्यपदार्थमा परिष्कृत चिनीको मात्रा उच्च हुन्छ । कोल्ड ड्रिङ्क, सोडा, सफ्ट ड्रिङ्कको सेवनले समेत कलेजोलाई असर गर्न सक्छ । अत्यधिक चिनीबाट बनेका खाने कुराले मात्र नभई बजारमा पाइने टमाटर क्याचअप, विभिन्न प्रकारको ससले पनि कलेजोलाई हानि पु¥याउन सक्छ । साथै, फ्रेन्च फ्राइजको सेवनले पनि समस्या गराउन सक्छ ।
फ्रेन्च फ्राइजको सेवनले केवल क्यालरीको मात्रा वा तौललाई मात्र बढाउँदैन । यसको सेवनले कलेजोलाई पनि नराम्ररी असर गर्न सक्छ । यसमा प्रयोग गरिने आलुले भन्दा पनि तार्नका लागि प्रयोग गरिने तेलले असर गर्ने देखिएको हो । घरमा पनि पकाउनका लागि धेरै किसिमको तेल प्रयोग गरिन्छ । तर, सबै तेलहरू फाइदाजनक हुँदैनन् ।
विज्ञहरू धेरै पकाउने तेलमा ओमेगा ६ हुने बताउँछन् । तर, खाना पकाउँदा तेल अक्सिडाइज हुन्छ र यसको कारणले फ्याट्टी लिभरको समस्या हुनसक्छ । त्यसैले खाना पकाउन प्रयोग गरिने तेल किन्दा ध्यान दिनुपर्ने हुन्छ । वास्तवमै कलेजोलाई स्वस्थ राख्नका लागि प्रशोधित गरिएको मासुको सेवन गर्नु हुँदैन । त्यस्ता खाद्य वस्तुहरूमा सोडियमको ठूलो मात्रा हुन्छ ।
अधिक मात्रामा सोडियमको सेवनले शरीरमा तरल पदार्थको असन्तुलन निम्त्याउँछ । यस कारण कलेजो फिल्टर गर्ने प्रक्रियामा अवरोध हुन थाल्छ र कलेजोसम्बन्धी समस्या आउन थाल्छन् । त्यस्तै, खाजामा प्रायः खाइने पाउरोटी पनि कलेजोका लागि फाइदाजनक हुँदैन । पाउरोटीमा परिष्कृत कार्बोहाइड्रेट हुन्छ साथै यसमा फाइबरको मात्रा पनि कम हुन्छ । जसका कारण यसले रगतमा ग्लुकोजको मात्रा बढाउँछ ।
इन्सुलिन उत्पादन हुन थालेपछि कलेजो वरिपरि फ्याटको मात्रा बढ्दै जान्छ र कलेजोका लागि गम्भीर समस्या हुनसक्छ । त्यसैले यस्ता प्रशोधन गरिएको मासु र पाउरोटीको सेवन त्याग्नु नै उचित हुने बताइन्छ ।
१.
२.
३.
