भरतपुर महानगरपालिका वडा न-२० का वडाध्यक्षको कोरोना संक्रमणबाट मृत्यु भएको छ । ६९ वर्षीय तामाङको आइतबार दिउँसो साढे ११ बजे उपचारकै क्रममा मृत्यु भएको भरतपुर अस्पतालले जनाएको छ । अस्पतालले निकालेको विज्ञप्ति अनुसार लामो समयदेखि उच्च रक्तचाप र सुगरको औषधि खाँदै आएका उनलाई ज्वरोखोकीसँगै श्वासप्रश्वासमा समस्या देखिएको थियो । असोज १६ गते संक्रमण पुष्टि भएका तामाङ घरमै आइसोलेसनमा रहेका अवस्था जटिल भएपछि २३ गते अस्पताल भर्ना गरिएको थियो, भरतपुर महानगरकी मेयर रेणु दाहालले बताइन् । उनका अनुसार शनिबार दिउँसोसम्म सामान्य अवस्थामा रहेका तामाङको स्वास्थ्यस्थिति जटिल हुँदै गएपछि आइतबार बिहान भेन्टिलेटरमा राखिएको थियो । तामाङ कांग्रेसबाट वडाध्यक्षको पदमा विजयी भएका थिए ।