सन्धिखर्क नगरपालिकाले भैंसी ब्याएपछि कृषकलाई सुत्केरी भत्ता दिने भएको छ । युवाहरुलाई पशुपालनमा लाग्‍न प्रेरित गर्न भन्दै नगरपालिकाले दुई हजार रुपैयाँ सुत्केरी भत्ता दिन लागेको हो ।

भैंसीको संरक्षण गर्न, कृषकलाई प्रोत्साहन होस् भनेर भत्ता दिन लागिएको नगरपालिकाका पशु विकास शाखा प्रमुख विजय खनालले बताए । भैंसी सुत्केरी भएको दुई महिनाभित्र भत्ता लिन आइसक्नुपर्ने र उक्त रकम पौष्टिक आहार खुवाउन प्रयोग गर्नुपर्ने नगरपालिकाले जनाएको छ ।

सन्धिखर्कमा नगरपालिकाभित्र करिब २० हजार भैंसी रहेको र तीमध्ये १० हजारजति ब्याउने अवस्थामा रहेको खनालले जानकारी दिए ।

जिल्ला सदरमुकाममा दैनिक १२ सय लिटर भन्दा बढी दूध उत्पादन हुन्छ । नगरपालिकाले पशु बिमाका लागि कृषकहरुलाई ५० प्रतिशत अनुदान दिएको छ ।

साभार:- कान्तिपुर