नयाँ नक्सा निसान छापमा समेट्न संविधान संशोधन भएको खुसियालीमा उर्लाबारीमा दीप प्रज्वलन ।।

प्रतिनिधिसभाले निसान छापमा नेपालको नयाँ राजनीतिक नक्सा प्रयोग गर्ने विधेयक पारित गरेपछि देशभर खुसियाली मनाइएको छ । निसान छापमा नयाँ नक्सा राख्न संसदमा प्रस्तुत भएको संशोधन विधेयक सर्वसम्मतिले पारित भएपछि उर्लाबारी सहित देशभर खुसियाली मनाइएको हो ।

नेपालको संविधानको निसान छापमा कालापानी, लिपुलेक र लिम्पियाधुरा समेटिएको नयाँ नक्सा राख्ने गरी संविधान संशोधन विधेयक प्रतिनिधिसभाबाट पारित भएको खुसियालीमा शनिबार साँझ नेकपानिकट राष्ट्रिय युवा संघ र अनेरास्ववियुले उर्लाबारी चोकमा दीप प्रज्ज्वलन गरेका छन् ।

भारतले अतिक्रमण गरेको भूमि समेटेर सार्वजनिक गरेको नयाँ नक्सा संविधानको अनुसूचीमा राखेको खुसियालीमा दीप प्रज्ज्वलन गरिएको राष्ट्रिय युवा सघं जिल्ला कमिटी सदस्य रबिन लामाले बताए । दीप प्रज्ज्वलनमा सहभागीले ‘लिम्पियाधुरा हाम्रो हो’, ‘चन्द्र, सूर्य हाम्रो स्वाभिमान’जस्ता नारा लेखिएका पम्प्लेट प्रदर्शन गरेका थिए ।

कार्यक्रममा राष्ट्रिय युवा संघ उर्लाबारी नगर अध्यक्ष नेता राजिब लिम्बुले नेपालका लागि आजको दिन महत्वपूर्ण भएकाले खुशी साट्न कार्यक्रम आयोजना गरेको बताए । उनले राष्ट्रियताका सवालमा युवा संघ दृढतापूर्वक उभिदै आएको र अहिले सरकारका विरुद्धमा आन्दोलन गर्नुपर्ने आवश्यकता नरहेको धारणा समेत राखे । सो अवसरमा नेकपाका नेताहरु मिलन दाहाल, भीष्म बुढाथोकी लगायतले संविधान संशोधन भएको आजको दिन महत्वपूर्ण रहेको र यस किसिमको महत्वपूर्ण भुमिका खेलेकोमा नेतृत्वप्रति आभार ब्यक्त गरे ।